PD çon në “Kushtetuese” ligjin për tatimin e profesioneve të lira
Deputetët e opozitës bënë padi në Gjykatën Kushtetuese kundër ligjit për tatimin mbi të ardhurat për profesionet e lira. Në padinë e firmosur nga 37 deputetet, përfshirë edhe aleatët e PD, kërkohet shfuqizimi i këtij ligji, të cilin e cilësojnë si një goditje të fortë kundër profesioneve të lira. “Gjykata Kushtetuese të ngrihet në nivelin që i takon, të mos caktojë precedentë të rrezikshëm për besueshmërinë e saj dhe të japë një vendim në të mirën publike, që në këtë rast shkon me shtresën e mesme. Gjykata Kushtetuese të mos zhgënjejë ata që besojnë tek institucionet dhe ligji”, - thuhet në padi. Sipas deputetes Jorida Tabaku, ligji ka element antikushtetueses dhe një prej tyre është norma e tatimit. “Sot u kërkohet profesioneve të lira, si avokat, dentist, mjekë, etj., të paguajnë një normë tatimi prej 15%, kur ndërkohë sistemi ynë ka normë tatimi 0%, 8%, 13%. Këtu cenohet barazia para ligjit”, - tha Tabaku. Sa i përket ndikimit ekonomik, efektet janë edhe më të mëdha. Tabaku argumenton se ky ligj cenon shtresën e mesme, e cila po largohet çdo ditë nga vendi. “Preken të paktën 30 mijë individë, pjesë e profesioneve të lira për një të ardhur në buxhet prej 30 mln euro. Ndërkohë preket një shtresa e mesme, e cila po largohet çdo ditë dhe është e mbitaksuar, gati 95% e popullsisë është e mbitaksuar”, - shtoi Tabaku. PD i kërkoi Gjykatës Kushtetuese shfuqizimin e këtij ligji. “Unë besoj se gjykata do të ngrihet në lartësinë që i takon dhe do të marrë një vendim të drejtë për ekonominë dhe mbi të gjitha për shtesën e mesme të vendit”, - përfundoi Tabaku. Ligji në fjalë taton në varësi të të ardhurave me 15 dhe 23 % bizneset që konsiderohen profesione të lira, 30 mijë të tillë në këtë fazë. Por mijëra biznese të tjera vijojnë të jenë me taksa zero, pasi qeveria ka premtuar se deri në 20229 biznesi i vogël nuk do të taksohet.