Leva: Napolin s'e llogaris, fitojmë për Ksavin

Polaku: Ka ardhur momenti të shënoj ndonjë gol më shumë për ekipin

Barcelona është në proces kërkimi për një trajner të ri për stolin duke nisur nga 1 korriku i këtij viti.

Sulmuesi i Barcelonës, Robert Levandovski ka folur për mediat e klubit duke nënvizuar momentin aktual që po kalon skuadra, gjendjen e tij të formës dhe gjithashtu çështjen e largimit të trajnerit Ksavi Hernandez.

MOMENTI AKTUAL

"Kam një vit e gjysmë te Barcelona dhe ndihem shumë mirë. Kam fituar trofe dhe kam shënuar shumë gola. Jam shumë i lumtur dhe i kënaqur. Shpresoj ta kemi hedhur pas krahëve momentin kritik. Tani vjen periudha më e rëndësishme e sezonit dhe dukemi në formë, por luajmë mirë dhe po shënojmë më shumë".

SERIA E GOLAVE

"Unë dua të bëj gjithnjë më të mirën. Kundër Getafes nuk shënova, por kemi luajtur shumë mirë duke shënuar 4 herë. Çdo sulmues dëshiron të shënojë në çdo ndeshje, por nëse gjërat shkojnë mirë për ekipin edhe nëse nuk shënoj kjo është e mjaftueshme".

KALENDARI I VËSHTIRË

"E kemi të qartë se na presin ndeshje shumë të rëndësishme përpara, duke nisur nga kjo javë në Bilbao. Jemi në një moment që nuk duhet të gabojmë më. Në javët në vazhdim shpresoj të rikuperojmë dhe ndonjë lojtar më shumë, sepse tani të gjithë janë të rëndësishëm. Përpara kemi dy kompeticionet më të rëndësishme, Ligën dhe Champions- in, duhet të jemi gati".

NAPOLI

"Është për të ardhur keq që nuk fituam në Itali, duke qenë se në pjesën më të madhe e dominuam ndeshjen. Nëse do të kishim shënuar një gol të dytë do i kishim mbyllur llogaritë. Nëse luajmë në shtëpi siç bëmë në Napoli jam i bindur se shkojmë në çerekfinale. Napoli është një ekip i rrezikshëm, me lojtarë të mirë, por ne duam ta fitojmë këtë ndeshje".

LA LIGA

"Në Liga situata është disi më e ndërlikuar. Ne duhet të fitojmë të gjitha ndeshjet tona dhe të presim nga gabimet e kundërshtarëve. Unë mendoj se asgjë nuk ka mbaruar. Por duhet të qëndrojmë me këmbë në tokë, sepse e dimë se nuk është e lehtë me dy skuadra

përpara". LARGIMI I KSAVIT

"Ai do të jetë në krye të ekipit deri në fund. Për ne është shumë e rëndësishme të jemi të fokusuar që të mund të bëjmë punën tonë. Për

Ksavin ka qenë një fazë e vështirë dhe emocionuese. Ai ka qenë një ish- lojtar i Barcelonës dhe është trajner i Barçës. Është shumë e vështirë për atë, sepse ai është gjithashtu një person shumë emocional. Për të, Barcelona është më shumë se një klub. E kuptoj që nuk duhet të jetë e lehtë për familjen e tij. Ne duhet të luajmë së bashku, të shkojmë në të njëjtin drejtim dhe të fitojmë edhe për të".