Rama në Azerbajxhan: Një qendër e gazit natyror të lëngshëm në Vlorë Kryeministri: Korridori Jugor e ka bërë Europën më të sigurt

I deklaruar edhe më herët, projekti për shndërrimin e Vlorës në një qendër të gazit natyror të lëngshëm mbetet në agjendën e qeverisë. Këtë angazhim kryeministri Edi Rama e theksoi edhe në takimin e 10- të të Korridorit Jugor të gazit në Azerbajxhan. "Duke u mbështetur në përvojën e suksesshme të bashkëpunimit me TAP në bashkëveprim me partnerët tanë synojmë të ndërtojmë një qendër të gazit natyror të lëngshëm në Vlorë, një qytet kyç bregdetar në jug të Shqipërisë", - tha Rama. Hapi i parë për shfrytëzimin e gazit natyror të lëngshëm për konsum të përgjithshëm është hedhur në Korçë. Gazifikimi i qytetit juglindor është në fazën e studimit dhe po aq edhe ai për tubin që do të lidhë TAP- in me TEC- in e Vlorës. "Në Shqipëri po kërkojmë të ecim përpara drejt projektit të gazifikimit të vendit edhe falë mbështetjes së Presidentit Aliev, duke shkuar kundër asaj që në traditën tonë historike na ishte privuar", - u shpreh kryeministri. Nëse ndërtimi i qendrës së gazit natyror të lëngshëm në Vlorë dhe gazifikimi i Korçës janë ende një projekt, lëvizja e lirë mes dy vendeve u arrit. Me nënshkrimin e saj, qytetarët do të lëvizin pa viza nga Shqipëria drejt Azerbajxhanit dhe anasjellas. Gjatë fjalës së tij përshëndetëse në këtë samit, kryeministri Rama është shprehur se synohet që të ndërtohet një qendër e gazit natyror në Vlorë në bashkëpunim me partnerët. "Po kërkojmë të ecim para drejt projektit të gazifikimit të vendit dhe e kemi nisur këtë proces gazifikimi duke shkuar kundër asaj, që në historinë tonë na ishte privuar. E vlerësojmë shumë këtë kapitull të ri në procesin tonë të zhvillimit. Duke u mbështetur në përvojën e suksesshme të bashkëpunimit me TAP- in, në bashkëveprim me partnerët tanë, synojmë të ndërtojmë një qendër të gazit natyror të lëngshëm në Vlorë, një qytet kyç bregdetar në jug të Shqipërisë", - tha Rama. Kryeministri u shpreh se Korridori Jugor ka ndryshuar jetë dhe e ka bërë Evropën më të sigurt, teksa shtoi se gazi i Azerbajxhanit së shpejti do të bëhet thelbësor për jetën tonë. Përveç adresimit në samitin e 10- të të Korridorit Jugor të gazit si i ftuar nderi i Presidentit të Azerbajxhanit, mes Edi Ramës dhe Ilham Aliyev pati një takim kokë më kokë. Shqiptarët që duan të udhëtojnë drejt Azerbajxhanit tashmë nuk kanë nevojë për viza. Në Azerbajxhan u nënshkrua dje marrëveshja për heqjen e vizave për qytetarët shqiptarë që udhëtojnë drejt Azerbajxhanit, duke hapur mundësi të reja për turizëm, zhvillim ekonomik dhe bashkëpunim mes dy vendeve. Dokumenti i marrëveshjes u firmos nga zëvendësministri për Europën dhe Punët e Jashtme dhe zëvendësministri i Punëve të Jashtme i Republikës së Azerbajxhanit, Fariz Rzayev. Lajmi u bë i ditur nga një postim në rrjetin social "X" të ambasadorit të Azerbajxhanit në Shqipëri, Anar Huseynov.