Evazion fiskal me dëm 195 milionë euro, kompania gjermane mashtroi me TVSH- në
Skema nisi në vitin 2017 me pajisjet elektronike dhe kulmoi në 2020- n me maskat anti- COVID, mashtrimi mbërriti edhe në vendin tonë
Për të goditur një grup të strukturuar kriminal me seli në Gjermani, Zyra e Prokurorit Publik Europian ka kërkuar bashkëpunimin e një sërë prokurorish të vendeve të Europës.
Mes tyre janë ftuar në hetim dhe bashkëpunim edhe prokurorët e SPAK. Skema që ka çuar në mashtrim me TVSHnë mësohet se ka lindur në vitin 2017 dhe ka kulmuar në vitin 2020. Fillimin e ka pasur me mjetet elektronike, ndërkohë që tre vjet më vonë futen në të njëjtën linjë mashtrimi me maskat anti- COVID. Sinjali i ekzistencës së këtij grupi kriminal e ka dhënë vetë Gjermania, ndërkohë që degëzimet e tyre mësohet se shtrihen në 16 shtete të tjera, mes tyre edhe në Shqipëri. SPAK ka ndërhyrë dy ditë më parë në 5 subjekte të identifikuara dhe të sinjalizuara nga Prokurori Publik duke nxjerrë fakte dhe prova të vlefshme për hetimin, por nuk bëhet ende me dije nëse është arrestuar në vendin tonë ndonjë person.
MEGAOPERACIONI
SPAK ka kryer hetime në koordinim me Zyrën e Prokurorit Publik Europian ( EPPO), ka zbuluar një bandë të strukturuar kriminale, që akuzohet për evazion fiskal me dëm 195 milionë euro. Raportohet për 14 të arrestuar në 17 shtete. Gjatë kontrolleve, forcat e rendit të këtyre shteteve sekuestruan sasi të mëdha telefonash inteligjentë, me vlerë më shumë se 15.3 milionë euro, një jaht me vlerë 3 milionë euro dhe 1.2 milionë euro para të gatshme dhe kriptomonedha. Janë sekuestruar disa makina, duke përfshirë një "RollsRoyce", një "BMW" dhe një "Range Rover". Në banesat e të dyshuarve janë gjetur edhe stoli, ora luksoze dhe 2.5 kg ar. Çështja është një mashtrim i dyshuar me TVSH- në, një skemë komplekse kriminale që përfiton nga rregullat e BE- së për transaksionet ndërkufitare ndërmjet shteteve të saj anëtare, pasi këto janë të përjashtuara nga tatimi mbi vlerën e shtuar ( TVSH). Pretendohet se, që nga viti 2017, një kompani gjermane ka udhëhequr skema të ndryshme të mashtrimit të TVSH- së që përfshijnë tregtinë e produkteve të vogla elektronike, përfshirë smartphon- at. Në vitin 2020, të njëjtët organizatorë të kësaj skeme besohet se kanë hyrë në treg për maskat mbrojtëse të fytyrës. Gjatë pandemisë COVID- 19, maskat mbrojtëse për fytyrën ishin shumë të kërkuara. Në letër, kompania e tyre ishte me bazë në Hong Kong, por maskat për fytyrën ishin në të vërtetë në një magazinë në Gjermani dhe mbetën atje derisa Ministria Federale Gjermane e Shëndetësisë i bleu ato nga kompania me seli gjoja në Hong Kong. Sipas hetimit, as kompania në fillim të zinxhirit të furnizimit, as kompania me bazë në Hong Kong, nuk e rimbursuan TVSH- në që kishin marrë pas shitjes së maskave për fytyrën në ministri.
NJOFTIMI ZYRTAR:
Prokuroria e Posaçme Kundër Korrupsionit dhe Krimit të Organizuar, në koordinim me Zyrën e Prokurorit Publik Europian ( EPPO), ka ndjekur hetimet për Operacionin e koduar "Cluster Midas", për veprën penale "Evazioni Fiskal", e kryer në formën e grupit të strukturuar kriminal. Këto aktivitete janë kryer duke krijuar fatura fiktive me qëllimin e rimbursimit të TVSH- së, si dhe shmangien e detyrimeve fiskale. Dëmi i kryer nga këto aktivitete llogaritet të jetë 195 milion Euro, i cili është i shpërndarë në 17 shtete kryesisht Evropiane. Prokuroria e Posaçme Kundër Korrupsionit dhe Krimit të Organizuar, në bashkëpunim me Policinë e Shtetit, ka kryer 5 kontrolle ambientesh, nga të cilat janë sekuestruar pajisje të ndryshme elektronike ( aparate telefonike, laptop, si dhe USB/ HDD), janë marrë në pyetje shtetas të ndryshëm, si dhe janë siguruar të gjitha provat materiale që subjektet në hetim kanë kryer në Shqipëri.