Basha: Qeveria e korruptuar, po bën çmos të godasë SPAK- un

“Lista të hapura!”, kreu demokrat: Ustallarët e vjetër të tranzicionit nuk kanë vullnet politik

Kryetari i Partisë Demokratike, Lulzim Basha, u shpreh dje i vendosur për lista të hapura, ndërsa theksoi se “do të kushtëzojnë çdo akt për një Kod Zgjedhor funksional, pasi sipas tij, Kodi aktual nuk funksionon.

Në Kuvendin Zgjedhor të Lezhës, Basha u shpreh se “ustallarët e tranzicionit nuk kanë vullnet politik”, por tha se PD do të qëndrojë e vendosur. Basha tha se në Parlament duhet të shkojnë njerëzit e zgjedhor nga qytetarët dhe jo ata që i zgjedh kryetari i partisë. “Në Parlament të shkojnë ata që votohen nga njerëzit dhe jo ata që caktohen nga kryetarët e partisë. Kjo është domethënia e propozimit tonë për listat e hapura. Pa diskutim në këtë aspekt edhe vendimet e Gjykatës Kushtetuese për këtë çështje dhe çështjen e votës së diasporës e bëjnë të qartë se cila është rruga ku duhet ecur. Siç është e qartë se nuk ka vullnet politik nga ustallarët e vjetër të tranzicionit me në krye kryeministrin aktual. Por ne do të ngremë zërin, ne do të kushtëzojmë çdo akt për një kod zgjedhor funksional, me këto parime, duke nisur me listat e hapur, që në Parlament të shkojnë burrat dhe gratë që duan shqiptarët”, - theksoi kreu demokrat. Basha u shpreh se qëndrimet e PD për zgjedhjet tashmë janë institucionalizuar. Ai deklaroi se garantimi i zgjedhjeve të lira dhe të ndershme do të kërkojë shumë më shumë sesa rregullat e lojës. “Por pa rregullat e lojës, nuk ka asnjë shans që të kemi një rrugë të hapur drejt një sistemi zgjedhor, ku qytetarët vendosin se kush do të shkojë në parlament dhe jo kryetarët e partive. Kjo është arsyeja pse PD ka dorëzuar j o thjesht në emrin e saj apo të opozitës, por në emrin e interesit të çdo qytetari propozimet për listat e hapura. Propozimin për Shqipërinë një zonë zgjedhore, për votimin elektronik dhe numërimin elektronik dhe për votën e shqiptarëve që jetojnë jashtë Shqipërisë. Propozimi për listat e hapura nuk është një manovër politike apo partiake, është zotimi ynë që Parlamenti të mos jetë më një konstelacion i atyre që vijnë nga listat e mbyllura të përcaktuara nga kryetarët e partive sipas formulës kushtetuese të 2008- ës. Që ishte dhe fillimi i fundit të republikës së parë pluraliste në Shqipëri dhe që sot është kthyer në një pronë private të Edi Ramës dhe të çirakëve të tij në qeveri”, - deklaroi Lulzim Basha. Gjatë fjalës së tij Basha ritheksoi edhe njëherë se mazhoranca po kërkon të kapë me çdo kusht SPAKun, pasi po tenton ngritjen e një komisioni të posaçëm për të mbikëqyrur këtë institucion. Ai theksoi se PD është në mbështetje pa kushte të SPAK- ut, sepse PD beson se ky është shansi i vetëm për t’i dhënë fund pandëshkueshmërisë dhe për të sjell barazinë para ligjit për çdo shqiptarë kudo ku ndodhet. “Struktura e Posaçme Anti- Korrupsion, e cila sot po anatemohet nga të gjitha anët, por në asnjë anë më shumë sesa nga kryeministri i cili në fshehtësi bashkë me njerëzit e tij në Parlament dëshiron të krijojë një komision të posaçëm për të mbikëqyrur SPAK- un. Dëshirë që i është shtuar në veçanti pas ngjarjeve të fundit, siç është intervista e ish- zëvendëskryeministrit tashmë në arrati dhe në kërkim ndërkombëtar dhe dënimi me burg të ish- drejtorit të Kundërzbulimit të FBI- së për Nju Jorkun, Charles Mcgonigal. Kësaj dëshire të çuditshme në fakt i është shtuar së fundmi edhe shqetësimi i kryeministrit shqiptar për sjelljen e hetuesve të Byrosë Kombëtare të Hetimit në zyrat e shtetit. Sigurisht për një njeri që ka rrahur gjoksin me të dyja grushtet se është autor i Reformës në Drejtësi, këto dy pohime janë shumë më problematike sesa të ulërijë në kupë të qiellit nga kupa e kokës kudër SPAK- ut apo BKHs. Janë domethënëse, sepse tregojnë qartë se Edi Rama ka frikë nga drejtësi a , i trembet drejtësisë dhe tani ka nxjerrë gërshërët për t’i prerë këmbët dhe duart e drejtësisë. PD është në mbështetje të institucioneve të drejtësisë, PD është në mbështetje pa kushte të SPAK- ut, sepse PD beson se ky është shansi i vetëm për t’i dhënë fund pandëshkueshmërisë dhe për të sjellë barazinë para ligjit për çdo shqiptarë kudo ku ndodhet”, - u shpreh Basha.