Telefoni i Kasandër Nogës kishte brenda fotot e shënjestrës së tij dhe të nipave
Kasandër Noga, i betuar për t’u hakmarrë ndaj vëllezërve Musabelliu ka mbajtur në celularin e tij fotot e shënjestrës dhe të nipave të tij që duheshin ekzekutuar në Tiranë. Kështu pretendon Prokuroria e Posaçme dhe Policia e Shtetit teksa ridolën pak ditë më parë në konferencë shtypi për të treguar se kishin hedhur dritë mbi ngjarjen. Në fakt, të dhënat kanë ardhur nga hetimi belg, i cili e ndoqi Nogën nga Belgjika deri në Vjenë për ta vënë në pranga pas atentatit që i bëri hasmit të vet, Erion Musabelliu. Sipas të dhënave, një nga provat kryesore që solli identifikimin e Kasandër Nogës, Kevin Suçit dhe personave të tjerë në planin për vrasjen e Geron Musabelliut dhe 3 nipave të tij në Tiranë, është telefoni i kapur Kasandër Nogës. Pikërisht në këtë telefon është gjendur fotografia e Geron Musabellit, teksa qëndron në këmbë në ambientet e bar- kafe “Neë Focus” në rrugën “Don Bosko”. Sipas të dhënave, veç Geron Musabelliut, në dosjen hetimore janë dhe fotografitë e tre nipave të tij. Ndërsa pjesë e linjës fotografike është dhe lokali ku ndodhi masakra e pas festës së vitit të ri. Kasandër Noga thuhet se kishte arritur të ngrinte një rrjet të përsosur informacioni për sa i përket lëvizjet të Geron Musabelliut. Ata kanë gabuar objektiv duke ngatërruar Geronin me Erjon Çelën, një person pa asnjë lidhje gjakmarrje dhe konflikti me Kasandër Nogën. Për shkak të kësaj ngatërrese të ndodhur në sekondat e fundit, në 4 janar 2022 në ambientet e kafe “Focus” Tiranë, mbeti i vrarë Erion Çela dhe u plagosën Blerim Çela, Edmond Crroj, Arben Dani dhe Azbi Selimaj. Personat kanë vepruar si grup i mirëfilltë kriminal dhe për këtë shkak pritet që në ditët në vijim Prokuroria e Tiranës të shpallë moskompetencën dhe çështja të kalojë për hetime të mëtejshme në Prokurorinë e Posaçme SPAK. Në këtë krim ku objektiv ishte Erjon Hasanbelliu, pjesëmarrës dhe organizatorë kanë qenë Kasandër Noga, Kevin Suçi alias Zeneli, vëllezërit Indrit dhe Gentian Beqiraj, Ilir Feçi dhe Roland Ahmetsulaj. Ndërsa vijohet puna për identifikimin e dy personave nga Fushë- Kruja, të cilët kanë qenë njerëzit që ka kryer vrasjen, të cilët policia ka më shumë se dy vjet që po i kërkon po ende nuk i ka gjetur dhe madje nuk iu di as identitetet.