Kompensimet nga ALUIZNI, 100 familjet që përfitojnë nga fondi 109 milionë lekë
ATP: Marrin pesë këste kompensimi në një masë prej 70 për qind të vlerës totale të miratuar me VKM- të përkatëse
Janë njëqind pronarë të prekur nga ndërtimet informale të legalizuara, të cilët përfitojnë një shumë në masën e 109 milionë lekëve në formë kompensimi, totali i të cilave arrin në jo më shumë se 70 për qind të vlerës së caktuar me vendim qeverie.
Agjencia për Trajtimin e Pronave ka bërë publike listën me qytetarët përfitues të pesë kësteve njëherësh bashkë me masën e shpërblimit për secilin dhe detajet e përcaktimit të kësaj shume. "Agjencia e Trajtimit të Pronave ( ATP) njofton se, më datë 29 . 02 . 2024, ka përfunduar procesin e shqyrtimit për 100 ( njëqind) kërkesa, të cilat përfitojnë këstin e parë, të dytë, të tretë, të katërt dhe të pestë të kompensimit në të holla në një total prej 70% të vlerës totale të miratuar me VKM- të përkatëse. Për 100 ( njëqind) kërkesat, e mësipërme, për të cilat ka përfunduar procesi i shqyrtimit nga ana e ATPsë, ka rezultuar se dokumentacioni i tyre është në përputhje me kriteret e përcaktuara në Vendimin e Këshillit të Ministrave nr. 383, datë 19.05.2010 "Për përcaktimin e procedurave të shpërndarjes së fondit të kompensimit në vlerë për pronarët e pasurive të paluajtshme, pronë private, që preken nga ndërtimet informale", i ndryshuar", citohet në njoftimin e ATP- së. Totali i kalon të 109 milionët. Sakaq, në pak ditë, ata do të kenë në numrin e llogarisë së dorëzuar shumën përkatëse. "Fondi financiar që shpërndahet nga ATP për këto 100 ( njëqind) kërkesa, është në vlerën: 109 015 941,23 ( njëqind e nëntë milion e pesëmbëdhjetë mijë e nëntëqind e dyzet e një presje njëzet e tre) lekë. Të dhënat në lidhje me pasuritë që kompensohen dhe mbi gjeneralitetet e subjekteve përfitues jepen në listën bashkëlidhur këtij njoftimi. Agjencia e Trajtimit të Pronave ( ATP) njofton subjektet e interesuara se vlerat përkatëse për secilin përfitues do të
jenë disponibël në llogaritë e tyre në bankat e nivelit të dytë pas përfundimit të procedurave të transfertave bankare në ditët në vazhdim", bën me dije Agjencia duke vënë në dijeni emrat e përmendur për lëvizjen financiare që do të kryhet në pak ditë.