Mbyllet mes kaosit seanca plenare, zgjat vetëm 10 minuta
Mes kaosit dhe tensionit u mbyll dje seanca plenare. Kjo seancë ishte parashikuar të zgjaste 4 orë, mirëpo tensioni i krijuar bëri që të mos kishte zhvillim normal të saj. Me pankarta në duar, deputetët e opozitës përdorën zhurmues dhe u frynë bilbilave duke bërë që seanca të zgjaste vetëm 10 minuta, ndërkohë deputeti demokrat Flamur Noka u përplas me Gardën e Republikës dhe po ashtu i ndërpreu fjalën deputetit socialist, Vullnet Sinaj, të cilit iu afrua me bilbil tek mikrofoni. Në këto kushte, kryeparlamentarja Lindita Nikolla vendosi mosvazhdimin e seancës së sotme plenare. Në rendin e ditës ishte parashikuar që të kishte diskutime për çështje të evidentuara nga zgjedhësit. Ndërkohë, demokratët pas bashkimit të grupit parlamentar, daljes në bazë dhe takimeve me strukturat drejtuese të partisë kanë vendosur të hedhin një hapin final përbashkues mes palëve. Lëvizja e radhës pritet të ligjërohet sot ku Kryesia dhe Këshilli Kombëtar janë thirrur për të diskutuar dhe miratuar disa ndryshime statutore, që kanë për qëllim krijimin e një hapësire për përfshirjen e grupimit të Gazment Bardhit në strukturat drejtuese të partisë që drejtohet nga Sali Berisha. Dy janë nenet që pritet të amendohen në statutin e demokratëve, neni 47 dhe neni 51. Sipas statutit të ri që do kalojë të martën për votim në dy forumet e larta drejtuese të kësaj force politike mësohet se kryetari i grupit parlamentar dhe nënkryetari i Kuvendit janë automatikisht nënkryetarë të PD për shkak të funksionit, pa qenë nevoja t’i nënshtrohen votimit.