Kreditë e reja për biznesin rekord në janar, tregtia në vend të parë

Sipas shifrave të fundit të publikuara nga Banka e Shqipërisë për muajin e parë të vitit 2024, vihet re një rritje e huave të reja të dhëna gjatë janarit drejt bizneseve dhe korporatave jofinanciare private të cilësuara sipas aktivitetit të tyre ekonomik. Kështu, gjatë muajit janar, flukset hyrëse të parasë në nivel huash të reja për biznesin fiksohen në rreth 17 miliardë. Krahasuar me janarin e vitit të kaluar, kemi një rritje prej 67.1%, ose e thënë në vlerë absolute, me 915 milionë lekë. Krahasuar me të njëjtën periudhë në 6 vitet e fundit, janari i këtij viti shënon vlerën më të lartë.

Sa u përket sektorëve që janë mbështetur më së shumti nga kreditë e shpërndara gjatë muajit janar shohim që mbizotëron "Tregtia me shumicë dhe me pakicë", me 4.8 miliardë lekë hua të marra nga banka, ose 10.7% më shumë se në janar të vitit 2023. Më pas, në vendin e dytë dhe të tretë renditen "Ndërtimi" dhe "Industria Përpunuese" me 3.1 miliardë lekë dhe 2 miliardë lekë kredi të re të huazuar nga banka.

Nga ana tjetër, të dhënat nga institucioni i bankës tregojnë se sektorët që iu drejtuan më pak bankave për kredi ishin "Aktivitetet profesionale shkencore dhe teknike" me 32 milionë lekë dhe "Aktivitetet e prodhimit të mallrave dhe shërbimeve për përdorim vetjak" me 48 milionë lekë. Ndërkohë, nëse analizojmë zgjerimin e portofolit për secilin sektor në terma vjetorë, shifrat thonë se sektori i "Industrisë Nxjerrëse" ka pasur rritjen më të lartë me 3275% dhe "Aktivetet e tjera të shërbimit" e kanë zgjeruar portofolin e tyre me 1027%. Ndërkohë, "Industria Përpunuese dhe "Tregtia" edhe pse kanë vlerën më të lartë të kredisë krahasur me sektorët e tjerë në muajin janar 2024, krahasuar me të njëjtën periudhë të vitit paraardhës këto sektorë e rritën financimin e tyre me 51% dhe 11% përkatësisht.