PD e Berishës, thirrje Bashës: Bashkohu me ne!
“Opozita po shkon drejt bashkimit”, Tabaku: Të mos sulmojmë njëri- tjetrin, por të rrëzojmë keqqeverisjen e Ramës
Demokratët po shkojnë drejt bashkimit të plotë si kundërvënie ndaj qeverisë me synimin e krijimit të një qeverie teknike, e cila sipas tyre, dihet t’u hapë rrugën zgjedhjeve të barabarta.
Agron Gjekmarkaj në intervistën e parë në cilësinë e nënkryetarit të “Rithemelimit” i bëri thirrje Lulzim Bashës të bashkohet me PD- në e vërtetë, qoftë edhe në diversitet. “I bëj ftesë edhe atij të kthehet tek partia që e ka rritur politikisht, që i ka dhënë aq shumë dhe të mos keqpërdoret për diversionin qeveritar ndaj opozitës. Ne jemi bashkuar në diversitet dhe diversiteti qëndron te mendimet e ndryshme. Në kuadër të këtij diversiteti, bëj ftesën dhe thirrjen që të gjithë kolegët që janë tek grupi ‘ Basha’, vetë z. Basha, të vijnë dhe të mos mbajnë ligjërimin te përçarjet, e cila është zvogëluar, pasi PD është bashkuar, por duke mbajtur peng, aq vlerë se ka vula dhe firma, mendoj se duhet të vijë dhe të gjej vendin e vet këtu”, - tha Gjekmarkaj për “News 24”. “Praninë e tij në PD e shoh si një akt modernizimi të të menduarit të Partisë Demokratike, që i jep status mendimit kritik brenda lidershipit të saj. Kjo sipas tij është diçka që ka munguar në partitë politike shqiptare dhe PDja edhe një herë tregon që mund të jetë novative në skenën politike të Shqipërisë. Një ditë pasi Këshilli Kombëtar e konfirmoi për të qenë nënkryetari i Partisë Demokratike, Gazment Bardhi shpreh bindjen se ndryshimet e miratuara nga ky forum e të propozuara më herët në kryesi ishin konform statutit të kësaj force politike. “Sa u takon zhvillimeve në statut ka qenë rregull, që kryetar i grupit parlamentar është edhe nënkryetar partie. Nuk ka asnjë lajm të ri. Ushtroj edhe përgjegjësinë e nënkryetarit. Është përgjegjësi dhe as post e as karrige. Çdo përgjegjësi është me një rëndësi themelore dhe secili duhet t’u shërbejë atyre pritshmërive që kanë demokratët”, - theksoi Bardhi. Ai u shpreh i gatshëm për të gjetur zgjidhjen lidhur me rikthimin e normalitetit në Kuvend, në rast se mazhoranca plotëson, sipas tij, kërkesat
kushtetuese të opozitës. “Shqipëria ka nevojë për të pasur parlament që funksion. Edhe për shkak të thirrjes, kemi shprehur gatishmërinë tonë për të gjetur zgjidhjen për situatën në Kuvendin e Shqipërisë. Kërkesat e paraqitura janë kushtetuese”, - tha Bardhi. E
në mungesë reflektimi nga ana e shumicës socialiste, grupi parlamentar i demokratëve ra dakord që të vijoje aksionin e mosbindjes civile edhe në seancën plenare të së enjtes.
UNIFIKIMI
Deputetja e PD- së, Jorida Tabaku, e ftuar në rubrikën
“Opinion” në “News 24”, duke folur për ndryshimet statusore që u miratuan në mbledhjen e Këshillit Kombëtar të Partisë Demokratike, deklaroi se ka qenë dhe mbetet pro çdo iniciative për bashkimin e opozitës. Tabaku tha se duhet që të mos e sulmojmë
njëri- tjetrin, por të kritikohet dhe të rrëzohet keqqeverisja e Ramës. “Jam pjesë e grupit parlamentar të Partisë Demokratike. Kam mbështetur Bardhin si kryetar të grupit parlamentar të PD- së. Pozitive është që opozita po shkon drejt bashkimit. Është e rëndësishme që ne po shkojmë tek njerëzit. Duhet të mos sulmojmë njëri- tjetrin, por të kritikojmë qeverinë e Edi Ramës. Nuk ka rëndësi se ku jam, e rëndësishme është që të bëjmë opozitë ndaj kësaj keqqeverisje. E rëndësishme është që opozita të bëhet më e gjerë, që të mos humbasë asnjë votë. Ne do të çojmë në Gjykatën Kushtetuese ligjin për profesionet e lira. Unë nuk besoj te barazia, por te drejtësia. Duhet të ketë drejtësi, çdokush të marrë atë që meriton. Po diskutojmë për një sistem, që ka prishur meritokracinë. Më kanë kontaktuar IT dhe persona të tjerë, që kanë hapur bizneset e tyre. Ky ligj prek rreth 30 mijë persona”, - tha Tabaku. Ajo theksoi se ligji për zonat e mbrojtura shkatërron natyrën. Sipas Tabakut, Rama ka kaluar në parlament disa ligje, që janë mirëfilli klienteliste. “Transparency International” ka deklaruar se disa ligje janë kaluar me porosi. U mbyllën dyqanet e lagjeve dhe janë hapur supermarketet ishte me porosi që të bëheshin disa persona të pasur. Ligji i basteve ishte me porosi. Ligji i zonave të mbrojtura tregon se mund të ndërtohen hotele, infrastrukturë dhe shërbime mbështetëse. Është praktikë e dëmshme, që po hapin dyert e të gjithë peizazheve natyrore, duke pasur primare fitimet. Unë shpresoj që presidenti të shohë të gjitha argumentet dhe të kthejë ligjin. Nëse presidenti nuk e kthen ligjin për zonat e mbrojtura, do ta çojmë në Gjykatën Kushtetuese. Shqiptarët po ikin masivisht, kjo tregon sesi po ecën ekonomia”, - deklaroi Tabaku.