“Ta ndalim”, Berisha: Rama po korrupton edhe Mcgonigalër të tjerë
“PD, një forcë e bashkuar”, ish- kryeministri: Shqipëria e Xhorxh Sorosit, e shndërroi vendin në protektoratin e krimit dhe drogës
Pas ndryshimeve statutore të grupit të “Rithemelimit”, deputetët demokratë diskutuan skenarin që do të përdorin sot deputetët e opozitës gjatë seancës plenare.
Në mbledhje u vu re mungesa e deputetit Dashnor Sula, i cili ka deklaruar se mbështet bashkimin e demokratëve vetëm përmes votës. Gjatë diskutimeve në grupin parlamentar u vendos që të vijohej me të njëjtin skenar në Kuvend, për të bllokuar punimet. Kjo pasi sipas tyre mazhoranca nuk ka asnjë reflektim për ngritjen e komisioneve hetimore apo dhe për bashkëkryetarin e Reformës Zgjedhore. Në një komunikim për mediat, kreu i grupit parlamentar Gazment Bardhi deklaroi se Kuvendi tashmë është kthyer në një vend, ku mbrohet vetëm interesi i një grushti njerëzish në dëm të qytetarëve shqiptarë. “Kuvendi vijon të mbrojë interesat e një grushti oligarkësh. Para një jave miratuan një ligj tërësisht me interesa klienteliste që i hap rrugë shkatërrimit të zonave të mbrojtura. Presidenti të mos fshihet, por të reagojë. Nesër kanë planifikuar një tjetër ligj klientilist për të zgjatur afatin e investimeve strategjike. Është hera e pestë që kartat e mazhorancës ngrihen për 5 njerëz në Republikën e Shqipërisë. Nga një ligj që u synua dhe propagandua për interesin publik u kthye në një ligj për interesat e një grushti njerëzish të përfitojnë nga ulja e taksave dhe të përfitojnë nga krimi dhe korrupsioni. Deputetët e mazhorancës nuk janë atje për t’u shërbyer Pëllumb Gjokës. Por për të kundërshtuar këtë dhe mbrojtur interesin publik”, - tha Bardhi.
Është hera e pestë që kartat e mazhorancës ngrihen për 5 njerëz në Republikën e Shqipërisë. Nga një ligj që u synua dhe propagandua për interesin publik u kthye në një ligj për interesat e një grushti njerëzish të përfitojnë nga ulja e taksave dhe të përfitojnë nga krimi dhe korrupsioni. Deputetët e mazhorancës nuk janë atje për t’u shërbyer Pëllumb Gjokës. Por për të kundërshtuar këtë dhe mbrojtur interesin publik
PROTESTA
Lideri demokrat, Sali Berisha, në fjalën e tij para mbështetësve shprehu bindjen se PD është një forcë e bashkuar dhe kjo sipas tij e tmerron Edi Ramën. Ai përmendi se bashkimi do përfshijë jo vetëm të gjitha forcat e vërteta politike opozitare, por mbarë shoqërinë shqiptare, elektoratin shqiptar, demokratë, socialistë, gri dhe cilido qoftë ai. “Ne kemi dhe do të kemi programin ekonomik më të shkëlqyer që ka pasur Shqipëria. Por mbi të gjitha, ne duhet t’u kthejmë shqiptarëve të drejtën e votës së lirë”, - theksoi Berisha. Sipas tij, sot Shqipëria është e Xhorxh Sorosit. Berisha përmendi se Sorosi solli këtu këtë farë pushtetarësh të lidhur këmbë e krye me krimin. “Pra, kjo është Shqipëria e Xhorxh Sorosit dhe jo Xhorxh Oruellit. Por janë njëlloj, u garantoj unë, nuk kanë ndonjë dallim. Se Xhorxh Oruell i përshkroi, kurse Xhorxh Soros i realizoi. Ai solli këtu këtë farë pushtetarësh të lidhur këmbë e krye me krimin. I sponsorizon këta. Ka shndërruar Shqipërinë në protektoratin e krimit dhe drogës. Dhe mbron regjimin më kriminal në Europë. Këto të gjitha këto miq, nuk duhet të na dekurajojnë. Të gjitha këto janë kushtrim për ne, janë thirrje për ne. Të gjithë në betejë. Në betejë pa kthim, mosbindje civile”, - deklaroi lideri i PDsë. Berisha denoncoi se Edi Rama po vazhdon të korruptojë Mcgonigalër të tjerë. Berisha deklaroi se, Rama e korruptoi Mcgonigalin dhe ky i fundit po bën tri vite burg. “Ndaj dhe çdo shqiptar, që e ndjen veten të detyruar ndaj këtij vendi, ndaj familjes, por edhe ndaj paraardhësve të tij, duhet të mobilizohet, duhet të bashkohet me ne, për të ecur drejt një qeverie teknike, e cila duhet të garantojë zgjedhje të barabarta, të ndershme, për të gjithë shqiptarët. Vetëm ne mund të realizojmë këtë objektiv. Të mos presim kurrë se do të vijë njeri të votojë për ne. Të mos presim kurrë se Edi Rama nxjerr mësime nga krimet që ka kryer. Por të marrim fatin tonë në dorë. Edhe njëherë, të trokasim në çdo votë dhe në çdo zemër shqiptari. Të bashkohemi në mosbindje civile me të gjitha metodat e saj gjersa të gjunjëzojmë këtë kalbësirë që përfaqëson krimin, përfaqëson shkelmimin e interesave të shqiptarëve, përfaqëson aleancën e pushtetit me krimin, përfaqëson pushtimin më të egër që ka shpopulluar shqiptarët ndonjëherë në historinë e tyre. U bëj thirrje emigrantëve tanë, diasporës shqiptare, i rikujtoj diasporës rolin e saj të jashtëzakonshëm në përmbysjen e diktaturës komuniste, mbajtjen gjallë të shpirtit të lirisë. Kjo diktaturë që bazohet në aleancë me krimin, vjedhjen e shqiptarëve dhe drogën, ka fuqi shkatërrimtare po aq të madhe dhe më të madhe se diktatura komuniste. Vërtet kjo nuk ka kampe përqendrimi dhe skuadra pushkatimi, por kjo ka banda ekzekutimi, ka skuadra të rrëmbimit të votave, ka polici politike të votës, ka gjykata dhe prokurori identike me ato që kishte diktatura e parë. Mos harroni të dashur shqiptarë kudo që jeni: Kryeministri aktual korruptoi Mcgonigalin dhe ai u dënua me rreth 3 vjet burg. Kurse ky vazhdon të korruptojë Mcgonigalër të tjerë”, - tha Berisha.