Gjyqtarja i kërkon avokatit të Gentjan Sharrës të tërhiqet: Kemi lidhje familjare!
Gjyqtarja dhe avokati i njërit prej të akuzuarve si anëtar i grupit të Nuredin Dumanit janë kushërinj. Konstatimi është bërë vetëm ditën e djeshme në sallën e gjyqit, në momentin kur ka filluar seanca gjyqësore. Deri në atë moment gjyqtarja nuk e dinte se kush e mbronte të pandehurin Gentjan Sharra. Në momentin që e ka parë kushëririn e saj në bankën e mbrojtjes, ajo i ka kërkuar që të largohet, por ky i fundit ka kundërshtuar. Ai i ka kërkuar trupës gjykuese të largohej gjyqtarja, pasi ai në fakt kishte kohë që ishte pajtuar nga i pandehuri për ta mbrojtur. Kështu, seanca e dytë në themel e dosjes “Plumbi i Artë” po kthehet në një proces nga më të çuditshmit në Gjykatën e Posaçme të Shkallës së Parë kundër Korrupsionit dhe Krimit të Organizuar. E teksa ezaurimi i gjyqtarëve ka sjell një trupë nga gjykatat me Juridiksion të Përgjithshëm të rretheve, ditën e djeshme, gjyqtarja e Durrësit, Entela Shedula konstatoi papajtueshmëri në lidhjen familjare që ajo vetë kishte me një nga avokatët e të pandehurve. Ajo iu drejtua avokatit të Gentian Sharrës me kërkesë që të hiqte dorë nga mbrojtja, pasi të dy pranuan njohjen dhe rrethanat familjare mes tyre. Por avokati, Sokol Harizaj e konsideroi të papranueshme një kërkesë të tillë pasi është pajtuar prej kohësh për të mbrojtur interesat ligjore të Sharrës dhe nëse duhej të tërhiqej dikush, ligjërisht duhet të tërhiqet gjyqtarja.
Togat e zeza u tërhoqën për të marrë një vendim lidhur me këtë ngërç, duke u rikthyer me vendimin e pazakontë të përj ashtimin e avokatit, duke i kërkuar të pandehurit të kërkojë një mbrojtës tjetër. Seanca e radhës u la më 29 mars në orën 11: 00. Seanca e parë dështoi në themel për shkak se nuk u plotësua trupi gjykues, teksa këtë të enjte munguan disa avokatë si dhe u konstatua papajtueshmëria e mësipërme. “Plumbi i Artë”, zbardhi dhjetëra ngjarje kriminale pas dëshmisë së Nuredin Dumanit, Skerdi Tases dhe Henrik Hoxhajt.