Liverpul- Siti ndahen në paqe
Nuk ka fitues në përballjen e fundit mes Guardiolës dhe Klopit në Premier
Mançester Siti i mbijetoi një breshërie të pjesës së dytë nga Liverpuli për të mbajtur një barazim 1- 1 në një përballje spektakolare në "Anfield", që fituesin e vetëm ka Arsenalin. "Topçinjtë" përfituan nga ndarja e pikëve të dy ekipeve të para për t'u ngjitur në krye të Premier Ligës. Takimi i fundit mes Jyrgen Klopit dhe Pep Guardiolës në kampionatin anglez përfundoi në paqe, ndërsa skuadra e "gjymtuar" e Liverpulit arriti të reagonte pas golit të Xhon Stonsit në pjesën e parë. Aleksis Mek Alister shënoi golin e barazimit nga pika e bardhë në fillim të pjesës së dytë, pasi Ederson pengoi Darvin Nunjezin në zonë, pas një pasimi të dobët të Natan Akes, duke e lënë portierin brazilian edhe të dëmtuar gjatë ndërhyrjes. Skuadra e Klopit, me Ibrahima Konatenë që iu shtua listës së infermierisë dhe me Mohamed Salahun që mundi të hynte në lojë vetëm si zëvendësues në pjesën e dytë, ishte skuadra e dytë më e mirë në fushë në pjesën e parë, por dominoi pjesën tjetër të lojës, duke humbur një sërë rastesh, me Luis Diazin në veçanti. Ishte një ndeshje spektakolare dhe me ritëm të jashtëzakonshëm, ashtu siç skuadrat e Klopit dhe Guardiolës dinë gjithnjë të dhurojnë, ndërsa nuk mungoi as nervozizmi. U pa nervoz edhe Kevin de Bryjne, i cili kundërshtoi zëvendësimin nga Pep Guardiola në pjesën e dytë. Por ndeshja pothuajse mori një tjetër kthesë kur zëvendësuesi i Sitit, Zheremi Doku, goditi shtyllën në minutën e 89- të. Liverpuli merr frenat e lojës edhe në sulmin final, madje ka protesta për një penallti të mohuar kur këmba e Dokut u ngrit deri në kraharorin e Mek Alisterit në shtesë, por pas kontrollit të VAR nuk ka penallti, duke lënë të zemëruar vendësit. Të dyja skuadrat ndajnë nga një pikë, e cila i lejon skuadrës së Mikel Artetës që të ngjitet në krye të klasifikimit, me pikë të barabarta me Liverpulin, por me golavarazh më të mirë.
Ndërsa Siti ndodhet vetëm një pikë më pas. Anglia në 10 javët e fundit do të vazhdojë të ketë një garë me tre korsi për titullin.