Ngërçi në Kuvend, SHBA dhe BE vihen në lëvizje, Wisner takon Nikollën

Thirrja, ambasadori i BE- së: Reflektoni realitetin politik! Ka përpjekje për të arritur disa reforma, proces gjithëpërfshirës

Ndërkombëtarët janë vënë në lëvizje për zgjidhjen e ngërçit parlamentar.

SHBA- të dhe BE- ja apelojnë për dialog parlamentar, por edhe rikthimin e bashkëjetesës normale në Kuvend mes mazhorancës e opozitës. Presioni i diplomacive të huaja në vendin tonë prodhoi një takim të parë mes Lindita Nikollës, Gazmend Bardhit, Bledar Çuçit dhe 2 krerëve të grupeve të vogla parlamentare Dashamir Shehi, e Mesila Doda. I dërguari me punë i SHBA- ve në vendin tonë, David Wisner takoi personalisht kryeparlamentaren për t’i përcjellë mesazhin se parlamenti duhet të rikthehet në normalitet. “Parlamenti është shumë i rëndësishëm për vendin dhe sistemin demokratik dhe është e dobishme që palët në Kuvend të angazhohen për t’u shërbyer qytetarëve dhe të ardhmes euro- atlantike të Shqipërisë”, - u shpreh David Wisner. Të njëjtën thirrje adresoi edhe ambasadori i BE- së, Silvio Gonzato. “Ne dëshirojmë një proces gjithëpërfshirës dhe konstruktiv, që reflekton realitetin politik”, - theksoi ai. Duke u nisur nga këto thirrje të vazhdueshme të ndërkombëtarëve, Lindita Nikolla do të ulë sot në orën 13: 30 tryezën e Konferencës së Kryetarëve, krerët e grupeve parlamentare Bledi Çuçin dhe Gazment Bardhin, i cili dy orë para, më 11: 30 ka thirrur në mbledhje deputetët e tij.

“I ngarkuari me punë, David Wisner, u takua sot me kryetaren e Kuvendit, Lindita Nikolla, për të theksuar angazhimin e SHBA- ve në forcimin e institucioneve demokratike të Shqipërisë, si dhe përpjekjet e saj në zbatimin e ligjit dhe kundër korrupsionit, teksa vendi ecën përpara drejt integrimit euroatlantik. Një parlament plotësisht funksional, ku përfaqësuesit e zgjedhur punojnë në mënyrë konstruktive për njerëzit është thelbësor për përmbushjen e këtyre synimeve”.

THIRRJA

Kryetarja e Kuvendit, Lindita Nikolla, priti dje të ngarkuarin me Punë të Ambasadës së SHBA- ve, David Wisner. Gjatë takimit u diskutua mbi kontributin e Kuvendit në forcimin e partneritetit strategjik mes Shqipërisë dhe Shteteve të Bashkuara dhe thellimin e reformave.

Nikolla nënvizoi se Kuvendi po punon për avancimin e reformës në drejtësi, luftën kundër korrupsionit dhe konsolidimin e institucioneve demokratike. Kryeparlamentarja e informoi Wisner mbi përpjekjet për rikthimin e veprimtarisë së Kuvendit në normalitet, për zhvillimin e debatit parlamentar gjatë seancave plenare, në mënyrë që publiku dhe qytetarët të njihen më mirë me përmbajtjen e legjislacionit që shqyrtohet e miratohet në Kuvend. Ambasada e SHBA- ve reagoi për takimin e Wisner me Nikollën duke vënë në dukje se diskutimet kryesore ishin bërë rreth kthimit në normalitet të Kuvendit, ku prej muajsh ‘ Rithemelimi’ shkakton kaos duke mos lejuar diskutimet dhe debatet mbi projektligje shumë të rëndësishme. “I ngarkuari me punë David Wisner u takua sot me kryetaren e Parlamentit, Lindita Nikolla, për të theksuar angazhimin e SHBA- ve në forcimin e institucioneve demokratike të Shqipërisë, si dhe përpjekjet e saj në zbatimin e ligjit dhe kundër korrupsionit, teksa vendi ecën përpara drejt integrimit euroatlantik. Një Parlament plotësisht funksional, ku përfaqësuesit e zgjedhur punojnë në mënyrë konstruktive për njerëzit është thelbësor për përmbushjen e këtyre synimeve”, - shprehet Ambasada e SHBA- ve. Edhe ambasadori i delegacionit të BE- së në vendin tonë, Silvio Gonzato, apeloi dje palët politike që të rikthejnë normalitetin në Kuvend. Nga Durrësi, i pyetur mbi situatën në Parlament, Gonzato tha për gazetarët se dialogu për të risjellë stabilitetin duhet të jetë konstruktiv dhe gjithëpërfshirës. Ai theksoi se procesi duhet të jetë gjithëpërfshirës dhe të reflektojë situatën aktuale politike, në mënyrë që të bëhen dhe reformat e nevojshme. “E kam thënë edhe disa kohë më parë kur u pyeta pikërisht për këtë çështje. Megjithatë, unë përdora fjalët që ne kishim thënë më parë dhe këto fjalë janë që ne dëshirojmë që procesi të jetë gjithëpërfshirës dhe konstruktiv. Duhet gjithashtu të reflektojë realitetin politik në vend”, - theksoi ambasadori. Po ashtu, ai komenton edhe nisjen e bisedimeve për të kthyer Parlamentin në normalitet. “Unë e di që ka disa përpjekje që po bëhen në Parlament, pikërisht për të arritur disa reforma në vend. Kryetari i Komisionit Qendror të Zgjedhjeve e ka bërë të qartë që këto janë çështje, të cilat ne besojmë do të zgjidhen së shpejti”, - tha Gonzato.