Meta: Qëndrimet e opozitës për Reformën Zgjedhore, të qarta dhe të panegociueshme
Kreu i Partisë së Lirisë, Ilir Meta shprehet se nuk do ta negociojnë Reformën Zgjedhore, ndërsa theksoi se vota e emigrantëve është një domosdoshmëri. Meta u shpreh se e kanë bërë të qartë si opozitë që Reforma Zgjedhore duhet të adresojë dhe të japë një zgjidhje për të gjitha fenomenet e vërejtura nga OSBE/ ODIHR. “Vota e emigrantëve është një domosdoshmëri, nuk duhet shtyrë më. E kemi bërë të qartë që Reforma Zgjedhore duhet të adresojë dhe të japë një zgjidhje për të gjitha fenomenet e vërejtura nga OSBE/ ODIHR, si për zgjedhjet e 2021 dhe ato të 14 majit 2023. Ne këtë drejtim mendoj se qëndrimet e opozitës janë të qarta dhe të panegociueshme, sepse janë në interes të një procesi të ndershëm zgjedhor. PL ka nisur procesin e saj të riorganizimit në të gjithë vendin, është një proces që do të intensifikohet duke forcuar partinë. Sa i takon raportit të PL me opozitën, ka qenë një raport tepër stoik dhe madje me kosto të mëdha për PL. Partia e Lirisë është një forcë që nuk negocion me këtë situatë kaq të rëndë të kapjes së shtetit nga një organizatë kriminale që quhet Rilindje, dhe nuk ka të bëjë asgjë me Partinë Socialiste”, - tha ai. Kreu i PL- së foli dhe për fushatën e anëtarësimeve të reja në PS, ku tha se është tregues i panikut të lidershipit. Ai u shpreh se paniku vjen nga manifestimi i 20 shkurtit dhe bashkimit të opozitës, duke e quajtur një fasadë, pasi sipas tij, qëllimi është grabitja e zgjedhjeve. “Mendoj se shfaqjet me anëtarësime të reja janë tregues i një paniku të lidershipit të PSsë për manifestimin e jashtëzakonshëm të 20 shkurtit dhe në përgjithësi për një proces bashkimi të opozitës dhe absolutisht, që është e qartë që janë fasada pasi i gjithë qëllimi i PS është grabitja e zgjedhjeve. Është një fushatë mashtruese, ku ndihet pakënaqësia mbarë popullore ndaj kësaj qeverie”, - u shpreh Meta.