Gjithë fa milja në poligon, Hygerta e aftë të qëllojë, gjurmë të Amarildos tek arma

Policia e Durrësit në bashkëpunim me prokurorinë kanë nisur kryerjen e eksperimenteve me tre fëmijët dhe bashkëshorten e Pëllumb Metës, 49- vjeçarit që u ekzekutua nga fëmijët e vet. Ose ky të paktën është versioni paraprak i krimit, ndonëse ka më shumë se 1 muaj që ka ndodhur. Kështu, kur kanë kaluar tri javë nga zbulimi i krimit makabër në Durrës, vrasja e Pëllumb Metës nga tre fëmijët, prokuroria ka siguruar prova të reja që hedhin dritë mbi ngjarjen. Nga ekspertimi në poligonin e qitjes, ka rezultuar se 19- vjeçarja, Hygerta Meta, që ka marrë përsipër autorësinë, është e aftë të kryejë qitje me pistoletë. Ndaj alibia se ajo nuk është e aftë të kryejë vrasje, tashmë ka rënë. E reja u dërgua në poligon bashkë me dy vëllezërit, Hysenin e Amarildon dhe nënën e tyre, Blerina Meta, por këta të fundit nuk pranuan të kryejnë testin, me pretendimin se nuk dinë të përdorin armën. Burimet policore nga grupi hetimor thanë se Hygerta Meta është në gjendje të mbushë “TT”- në, e ngjashme me pistoletën e krimit dhe ka kryer qitje. Ndërsa 25- vjecari Hysen Meta, që grupi hetimor beson se është ekzekutori i të atit, ka refuzuar të qëllojë duke thënë se nuk di të mbajë armën. Të dhënat e këtij eksperimenti po krahasohen me ato të përpiluara nga ekspertët gjatë këqyrjes së vendngjarjes. Prokuroria e Durrësit ka siguruar dhe një tjetër provë të rëndësishme. Nga ekspertiza balistike në armën e krimit kanë dalë gjurmët e gishtërinjve edhe të djalit të vogël, Amarildo Meta. Mbi këtë provë, prokuroria pritet të ndryshojë akuzat ndaj 21- vjeçarit, i cili deri më sot hetohej vetëm për fshehje të kufomës. Gjatë marrjes në pyetje ka deklaruar se armën e ka prekur pas krimit. 49- vjeçari Pëllumb Meta u vra më 10 shkurt në banesën e tij në fshatin Shënavlash dhe 3 fëmijët e varrosën në kasolle, në tentativë për të fshehur kufomën. Ngjarja tronditëse u zbulua nga policia më 23 shkurt, pasi djali i madh e denoncoi të zhdukur. Që prej arrestimit e deri më sot, 3 fëmijët kanë dhënë deklarata kontradiktore, ndaj po kryhen hetime intensive për zbardhjen e autorit kryesor. Sa i përket shkaqeve, dhuna në familje dhe fejesa me shkuesi e Hygertës mbeten pista kryesore. Nuk përjashtohet as konflikti për pronat. Nga hetimi pasuror rezulton se viktima kishte dy shtëpi dhe një sipërfaqe toke në zonën industriale të Durrësit.