Escobar: Moment kritik, Kosova dhe Serbia të punojnë për një marrëveshje historike

Presidentja Vjosa Osmani: Të ketë qasje parimore e të barabartë ndaj palëve

Ashtu siç ishte njoftuar më parë, i dërguari I Shteteve të Bashkuara për Ballkanin Perëndimor, Gabriel Escobar, ka mbërritur në Kosovë ditën e djeshme ku është pritur nga presidentja Vjosa Osmani.

Në një konferencë për mediat, Escobar ka thënë se nuk i kërkohet vetëm Kosovës të marrë vendime të vështira, por e njëjta thirrje vlen edhe për Serbinë për të zbatuar Marrëveshjen e Ohrit. "Ka shumë punë për të diskutuar për disa sfida, duke përshirë edhe vendimin e BQK- së për të gjetur mënyra se si të ecim përpara që përfshijnë Asociacionin po jo vetëm atë. Siç e përmendi edhe presidentja, të dyja palët duhet të vazhdojnë me zbatimin e plotë dhe gjithashtu për të pasur një marrëveshje historike. Por, ne ftojmë edhe Serbinë që të vazhdojë të zbatojë, prandaj nuk është një përpjekje unilaterale që vetëm Kosova duhet të marrë vendime të zorshme e të vështira që marrëveshja e Ohrit të bëhet realitet", tha ai. Escobar ka përsëritur që Shtetet e Bashkuara nuk e kundërshtojnë legjitimitetin e vendimit, mirëpo kanë probleme me mënyrën e zbatimit dhe për ndikimin që ka te komuniteti serb.

Ndërkaq, sa i përket dialogut mes Kosovës dhe Serbisë, ai u shpreh se ky proces ndodhet në një moment kritik.

REAGIMET

Në një konferencë të përbashkët me të dërguarin e SHBA për Ballkanin Perëndimor, Gabriel Escobar, presidentja e Kosovës Vjosa Osmani, deklaroi se BE- ja si ndërmjetëse e dialogut Kosovë- Serbi duhet të ketë qasje parimore e të barabartë ndaj palëve. "Jemi thellësisht të përkushtuar. Kam potencuar gjatë këtij takimi se suksesi i këtij procesi varet edhe nga qasja parimore dhe e barabartë e ndërmjetësuesit në këtë rast të BE- së ndaj palëve dhe që është kruciale që të ketë zbatim të plotë të marrëveshjeve të dakorduara në vitin e kaluar, veçanërisht marrëveshjes bazike dhe aneksit të Ohrit. Prandaj, qasja selektive vetëm e neneve të caktuara të marrëveshjes nuk do të ndihmojë, sepse të gjitha nenet kanë rëndësi, prandaj edhe zbatimi duhet të jetë i plotë dhe jo i pjesshëm", tha

Osmani. Më tej, ajo shtoi se në këtë drejtim, angazhimi dhe roli i SHBA- së mbetet kyç për një përmbyllje të suksesshme të procesit të dialogut që do të çonte drejt njohjes së ndërsjellë siç është përmendur në letrën e fundit të Presidentit Biden. "Falënderoj partnerët ndërkombëtarë, veçanërisht SHBA- në për konfirmimin e tyre të vazhdueshëm se rendi kushtetues, integriteti territorial dhe funksionaliteti i shtetit të Kosovës do të mbrohen përherë", tha presidentja Osmani. Zëdhënësi i BEsë, Peter Stano, është dakordësuar me qëndrimet e Bashkimit Evropian pothuajse plotësisht lidhur me Kosovën dhe zyrtarët e saj. Ai theksoi se BE- ja nuk komenton vërejtje individuale, pasi u pyet rreth deklaratave të emisarit amerikan për Ballkanin Perëndimor, Gabriel Escobar, i cili një ditë më parë tha se SHBA- ja dhe BE- ja kanë problem në komunikim me kryeministrin e Kosovës, Albin Kurti. "Partnerët tanë e vlerësojnë situatën ashtu siç e shohin të arsyeshme.

Mund të them vetëm në përgjithësi se, kur bëhet fjalë për Kosovën dhe sjelljen e administratës aktuale në Prishtinë, pikëpamjet tona dhe partnerëve tanë amerikanë pothuajse përputhen 100 për qind", tha Stano. Ndërkohë, pritet që Escobar të zhvillojë takimin me kryeministrin Albin Kurti ditën e sotme. Dy ditë më parë, në një takim "online" me gazetarët, Escobar e ka quajtur "katastrofik" dhe "jokompetent" vendimin e autoriteteve të Kosovës për të zbatuar rregulloren e Bankës Qendrore të Kosovës ( BQK) që e përcakton euron si valutën e vetme për kryerje të pagesave me para të gatshme.