Gurthemeli i Albin Kurtit
Gurthemeli, që ndan qeverisjen demokratike nga pushtetet e korruptuara, por edhe diktaturat e mirëfillta, është përcaktimi i vijës së qartë në vendimmarrje ndërmjet interesit publik dhe atij të grupit ose individit. Me vepra dhe jo predikime. I vetmi politikan shqiptar, që e ka vendosur dhe përpiqet ta zbatojë, është Albin Kurti. Në të gjitha qeverisjet e deritashme të hapësirës mbarëshqiptare Shqipëri, Kosovë etj., nuk ka rast të dytë. Ardhja e Kurtit në qeverisje shënon njëkohësisht largimin nga vendimmarrja të oligarkisë së krijuar nga qeverisjet e mëparshme. Në fakt, ai u votua masivisht nga qytetarët pikërisht për luftën kundër korrupsionit dhe oligarkisë, si vrasës të zhvillimit ekonomik, mirëqenies dhe besimit në demokraci. Për asgjë tjetër, përfshi edhe kufijtë e Kosovës.
Gurthemeli i interesit publik dhe largimi i oligarkisë nga vendimmarrja janë shumë të rëndësishme jo vetëm për zhvillimin ekonomik, mirëqenien dhe demokracinë të Kosovës, por gjithë hapësirën shqiptare. Në radhë të parë Shqipërinë, por edhe për pjesën shqiptare në Maqedoninë e Veriut. Pikërisht, kjo është arsyeja thelbësore e sulmeve të ashpra të sinkronizuara ndaj Albin Kurtit nga përfaqësuesit politikë të oligarkisë mbarëshqiptare. Sulme, që shërbehen nga mjetet e fuqishme mediatike, financiare, por edhe institucionale. Shembulli i Kosovës se mund të qeverisësh edhe pa oligarkë, është kambanë alarmi edhe për korrupsionin politik në Shqipëri.
Por, vendosja e gurthemelit të interesit publik është mjaft i vështirë në Kosovë. Në Shqipërinë londineze edhe më shumë. Përfituesit oligarkë dhe përfaqësuesit e tyre politikë nuk mund të pranojnë lehtë humbjen e pushtetit. Ata zotërojnë financa kolosale, media me shumicë dhe përfaqësues në institucione të pavarura. Përfshirë edhe grupe të rrezikshme të nëntokës mjaft të fuqishme në Shqipëri, Kosovë dhe rajon. Edhe kushtet ndërkombëtare nuk janë të favorshme. Përplasjet e forta me Rusinë i shtyjnë partnerët euroatlantikë të kërkojnë stabilitet në rajon edhe duke sakrifikuar përpjekjet për demokraci. Serbia nga ana e saj, përveç aleate e shpallur e Rusisë, është kundërshtare e ashpër e një Kosove demokratike. Modeli serb është pikërisht qeverisje e korruptuar mbështetur në oligarkinë. Nga ana e tyre, oligarkët në rajon janë aleatë të njëri- tjetrit pa dallim përkatësie kombëtare.
Nga ana tjetër, vendosja e gurthemelit të interesit publik nuk sjell detyrimisht mirëqenie të menjëhershme. Ajo është kusht i domosdoshëm, por jo i mjaftueshëm për zhvillim. Ndërkohë, qytetarët e lodhur kërkojnë përmirësim të shpejtë ekonomik. Kjo është edhe pika e dobët e qeverisë “Kurti”. Pa dyshim, niveli i korrupsionit është ulur qartësisht. Mjafton të ndjekësh raportimet mediatike. Nëse në qeverisjen “Kurti” përflitet për korrupsion në nivele prej dhjetëra e qindra mijëra eurosh, në qeverisjet e mëparshme bëhej fjalë për raste dhjetëra dhe qindra milionë euroshe.
Por, nga ana tjetër është shqetësuese, se edhe ritmet e investimeve publike dhe projektet zhvilluese janë ndjeshëm të ulëta. Lufta kundër korrupsionit në prehje nuk ka vlerë për zhvillim dhe mirëqenie. Përkundrazi. Qeverisja “Kurti” është treguar e paaftë të zbatojë në praktikë strategjinë e saj të saktë të zhvillimit ekonomik. Mëkat, sepse janë plotësisht kushtet dhe mundësitë financiare, ekonomike dhe njerëzore.
Në kushte të tilla të vështira qeverisjeje edhe Albin Kurti është i shtrënguar të shfrytëzojë politikisht komerdaren e vjetër të qeverisjeve në Prishtinë dhe Beograd, kur kërkojnë të shmangin problemet ekonomike të brendshme. Në radhë të parë, konfliktin e kufijve të veriut. Pastërtia personale e Kurtit dhe qeverisjes së tij ndaj korrupsionit i ka dhënë Kosovës mundësinë të tejkalojë edhe disa kufij të pamendueshëm më parë në raportet me partnerët strategjikë. Qeveritarët e korruptuar në asnjë rast nuk mund t’u thoshin ‘ Jo’ partnerëve. Fakt është se sot autoriteti i shtetit të Kosovës është shtrirë si kurrë më parë në veri. Fitore e rëndësishme kombëtare. Por, pavarësisht se kjo ngjall emocione pozitive te qytetarët, është e pamjaftueshme.
Suksesi i vërtetë i modelit demokratik të qeverisjes pa oligarkë dhe në interes publik duhet të vendoset në zhvillim ekonomik dhe mirëqenie. Sa më shpejt. Projektetidetë, njerëzit dhe mundësitë janë. Përndryshe, gurthemeli i hedhur i Kurtit rrezikon të zhbëhet nga kundërshtarët e fuqishëm pa dallim kufijsh dhe kombësish. Mbase mund të jetë edhe parakohshme për shoqërinë shqiptare dhe kushtet ekonomike dhe gjeostrategjike.
Ka një ngjashmëri historike në përmbajtje të gurthemelit të Kurtit me përplasjen e demokratëve të Nolit me bejlerët e Zogut në 1924. Saktësisht plot 100 vite më parë! Përfundimi dihet. Uroj të mos përsëritet!