Gjermania shpall listën, rikthehet Kros, jashtë Humels
Nagelsman: Dyert mbeten të hapura për të gjithë
Gjermania nis përgatitjen për Europianin që do të presë në shtëpi këtë verë! Për kombëtaren gjermane vijnë ndeshjet e para të këtij viti 2024.
Më 23 mars, skuadra e Julian Nagelsmanit do të përballet me Francën në Lion, ndërsa tri ditë më vonë "pancerat" e 36- vjeçarit do të përballen në miqësoren e dytë të luksit, kundër Holandës në Frankfurt. Ditën e enjte, ish- trajneri i Bajernit të Mynihut shpalli skuadrën për provat e vështira të ardhshme ndërsa nuk munguan surprizat. Njëra ishte që portieri i Frankfurtit, Kevin Trap nuk arriti të marrë një ftesë në skuadër, duke humbur konkurrencën me kapitenin Manuel Nojer, Marc- Andre ter Shtegen, Bernd Leno dhe Oliver Bauman. U konfirmua rikthimi i Toni Krosit në kombëtare, ashtu si lajmi që përflitej, ftesa e parë e talentit të Bajernit Aleksandar Pavloviç, i cili ka luajtur vetëm 14 ndeshje me rekordmenët gjermanë, por ia doli të fitojë besimin e Nagelsmanit. Jo surprizë ishte edhe lënia jashtë e Mats Humelsit, për të cilin Nagelsman tha: "Mats nuk po kalon një moment të mirë me Borusian e Dortmundit për momentin. Mats nuk ishte zgjedhja ideale për rolin e rezervës në këtë moment. Ka lojtarë të tjerë". Pastaj një koment për ftesën e parë për Pavloviç: "Do të shohim nëse këto teste do të jenë në mjaftueshme për një ftesë në Europian. Ai është një zë në dhomën e zhveshjes dhe nuk fshihet pavarësisht moshës së tij të re. Edhe për ata që nuk janë në këtë grumbullim dyert do të vazhdojnë të jenë të hapura". Ilkai Gyndoan konfirmohet kapiten, ndërsa për duelin Nojer- Ter Shtegen për portën, Nagelsman tha: "Ilkai mbetet kapiten. Lojtarët duhet të ndihen sikur kanë një lider në radhët e tyre. Ai është përfaqësues i skuadrës dhe do të vazhdojë të mbajë shiritin. Do të kemi një bisedë me Nojer dhe Ter Shtegen. Dhe më pas do të vendosim sesi do t'i planifikojmë të dyja ndeshjet".