Shembja e rrugës Korçë- Ersekë/ Inxhinieri: Balluku duhet të kishte dhënë dorëheqjen
Romeo Nazarko: Korrupsioni bën që të shemben rrugët, nuk u respektuan standardet teknike
Inxhinieri Romeo Nazarko ka thënë se ministrja e Infrastrukturës, Belinda Balluku, duhet të kishte dhënë menjëherë dorëheqjen pas shembjes së aksit rrugor KorçëErsekë.
Duke folur për arrestimin e drejtorit të ARRSH- së, Evis Berberi, Nazarko shtoi se edhe anëtarët e Bordit kanë përgjegjësinë e tyre në këtë rast. "Arrestimet vijnë si rezultat i moszbatimit të ligjeve nga këta zyrtarë, por lidhjet mund të shkojnë edhe më tej se Berberi. Të gjithë drejtorët e ARRSH po bien në pranga. Drejtori ka një pjesë të përgjegjësisë, por përgjegjësi kanë edhe zyrtarë të tjerë. Përgjegjësi kanë edhe anëtarët e bordit. Bordi ka qenë në dijeni të pabarazive në tendera të Belerit. Ne na lind dyshimi se Berberi mund t'i ketë dhënë tendera edhe anëtarëve të Bordit", - tha ai. Nazarko shtoi se është i domosdoshëm ligji për urdhrin e inxhinierit. "Korrupsioni bën që të shemben rrugët. Është përgjegjësi e ministrisë që të bëjë urdhrin e inxhinierit, ende nuk kemi ligjin e urdhrit të inxhinierit. Edhe ministrja Balluku duhet të mbajë përgjegjësi ligjore", - shtoi inxhinieri. Më tej, ky i fundit deklaroi se shembja e rrugës ndodhi për shkak se nuk u respektuan standardet teknike, që monitorohen direkt nga Ministria e Infrastrukturës. Romeo Nazarko u shpreh se aksi Korçë- Ersekë është projektuar keq që në gjenezën e saj, duke shtuar se "i gjithë problemi ishte vlera, jo se donin të bënin rrugë. "U rrëzua rruga KorçëErsekë akoma pa u inauguruar. Ka rënë si pasojë e mosrespektimit të standardeve teknike, që monitorohen direkt nga ministria e lindjes. Muret janë mbajtëse, por nuk mban dot veten e vet. Nuk mban dot gjithë ngarkesën nga shembjet masive që ka. Ergys Vjerdho ka qenë iniciatori i këtij abuzimi, këto janë gabime sistematike. Një gabim që ka bërë Ergysi, ky e ka vazhduar dhe drejtori i radhës që do të vijë, do të vazhdojë trashëgojë. Që në gjenezë është një rrugë e projektuar keq, në një strukturë jo të qëndrueshme. Është një shtrat me qëndrueshmëri të dobët, nuk janë bërë studime fiziologjike në kohën e duhur. I gjithë problemi ishte vlera, jo se donin të bënin rrugë", - u shpreh ai në "News 24". Nazarko ka nënvizuar edhe përgjegjësitë që ka bordi i ARRSH lidhur me shembjen e rrugës Ko
rçë- Ersekë. "Bordi i ARRSH- së është një ndër shumë institucionet që ka ministria. Përgjegjësia më lart është ministria vetë, që e krijon të gjithë këtë konflikt dhe të gjithë këto pasoja që dalin nga buxheti i shtetit. Ministria brenda ka një sektor që quhet sektori i licencimit që bën licencime fiktive të inxhinierëve. Ne kemi sot inxhinierë që ndodhen jashtë territorit të Shqipërisë, por që licencat e tyre qarkullojnë nëpër kompani që kryejnë punime në vend dhe për të gjitha këto është përgjegjësi e ministrisë", - deklaroi inxhinieri.