Mbyllen hetimet për koncesionin e sterilizimit, pritet komunikimi i akuzave
Ish- ministri i Shëndetësisë dhe 8 persona të tjerë do të dalin në gjykatë Hetimi i SPAK për procedurat e koncesionit 100 mln eurosh për 10 vjet, dyshime për shpërdorim detyre, mashtrime dhe falsifikime
Dje ishte përcaktuar edhe afati i fundit që Prokuroria e Posaçme kishte për mbylljen e hetimeve për dosjen e koncesionit të sterilizimit. Në këtë hetim gjendet ish- ministri i Shëndetësisë bashkë me vartësin e tij, një biznesmen dhe disa persona të tjerë.
Ndërkohë që Ilir Beqaj prej më shumë se dy muajsh i kërkon SPAK- ut dhe GJKKOsë të jepen aktet hetimore, që të njihet me përmbajtjen e tyre, në fakt jo vetëm që nuk iu dhanë, por edhe bëhet me dije se ditën e hënë atij do t'i komunikohet akuza. Ndonëse nuk bëhet e qartë nëse Prokuroria ka mundur ta finalizojë të gjithë procesin hetimor, në lidhje me hetimin e gjatë dhe kompleks, por bëhet me dije se në javën e fundit të marsit do të vendoset nëse do të nisë gjykimi i çështjes, apo do të vijojnë hetimet te persona të tjerë që dyshohet se janë të përfshirë në atë aferë. Deri në këtë fazë zyrtarisht bëhet me dije se hetimet janë përqendruar mbi procedurat e dhënies së koncesionit prej 100 milionë eurosh për 10 vjet, pas dyshimeve për ' shpërdorim detyre', ' mashtrime' dhe ' falsifikim dokumentesh'. Beqaj, ndryshe dy prej miqve të tij, është hetuar në gjendje të lirë, ndërkohë që gjithnjë ka mohuar të kishte bërë shkelje apo të ishte fajtor për akuzat e ngritura nga SPAK. Në fakt, Prokuroria e Posaçme në bashkëpunim me Byronë Kombëtare të Hetimit morën një aksion të madh kontrollesh nëpër depo dhe kompani farmaceutike, për të cilat në fakt nuk janë shprehur ende se çfarë kanë sekuestruar dhe njëkohësisht konstatuar. Po ashtu, në atë kontroll u mësua se BKH shkoi edhe në disa farmaci, ku u sekuestruan praktika dhe dokumente, por në lidhje me atë operacion, SPAK u tregua hermetik.
MBYLLJA E HETIMEVE
Ish- ministri i Shëndetësisë dhe 8 të tjerë janë zyrtarisht nën akuzë nga SPAK për dosjen për koncesionin e sterilizimit. Prokuroria e Posaçme ka mbyllur hetimet e para dhe po u komunikon akuzat 9 të pandehurve, ndërsa pas 10 ditësh në pritje të prapësimeve, do ta dorëzojë dosjen në GJKKO me kërkesën për nisjen e gjykimit. Ilir Beqaj, i cili akuzohet për ' shpërdorim detyre', do të jetë në bankën e të akuzuarve së bashku me ish- zëvendësin e tij në Ministrinë e Shëndetësisë, Klodian Rrjepaj dhe biznesmenin Ilir Rrapaj, që mori koncesionin e sterilizimit, të dy në burg që prej gushtit të kaluar, aty ku u janë komunikuar edhe akuzat. Zv. ministri akuzohet për ' shpërdorim detyre' ndërsa biznesmeni për ' mashtrim'.
Në gjykim do të shkojnë edhe 6 ish- zyrtarë të Ministrisë së Shëndetësisë, të cilët kanë qenë anëtarë të komisionit të tenderit të sterilizimit. Saimir Kadiu, drejtor ekonomik dhe Marsela Serjanaj drejtoreshë juridike, të cilët janë në arrest shtëpie dhe mjeku Arben Gjata, Naile Ajazi, Genc Byrazeri dhe Petro Mersini që deri më tani kanë pasur masën ' detyrim me paraqitje'. Ndërkohë që një muaj më parë u vendos sekuestro edhe ndaj dy kompanive të Rrapajt dhe disa aksione të tij në një shoqëri tjetër tregtare. Hetimet janë kryer nga prokurorët Edvin Kondili dhe Ened Nakuçi, të cilët kanë pritur deri në momentet e fundit për mbylljen e hetimeve, afati i të cilave përfundonte pikërisht më 15 mars. SPAK akuzon për shkelje në procesin e koncesionit të sterilizimit me vlerë 100
milionë euro dhe afat 10vjeçar, të fituar nga biznesmeni Ilir Rrapaj. Prokuroria thotë se në dhënien e koncesionit të akuzuarit nuk kanë respektuar ligjin dhe kanë shpërdorur detyrën, ndërkohë që sipas akuzës, Ilir Beqaj ka pasur njohje dhe miqësi të fortë me biznesmenin Ilir Rrapaj. Ndër gjetjet e konstatuara nga SPAK janë edhe procedurat e ndjekura për fituesin, por edhe mosrealizimi i kushteve të parashikuara në kontratë.
HETIMI
Ish- ministrit të Shëndetësisë, Ilir Beqaj, do i komunikohet të hënën akuza e "Shpër
dorimit të detyrës", ndërsa sot pritet të paraqitet para oficerit gjyqësor, pasi ndaj tij është marrë masa e "detyrimit me paraqitje". Brenda afatit 10- ditor të akuzuarit kanë të drejtën të paraqesin kundërshtimet e tyre pastaj prokurorët Edvin Kondili dhe Ened Nakuçi dërgojnë dosjen në GJKKO. I takon gjyqtarit të seancës paraprakeve vendos nëse do e kalojë dosjen në gjykatë për gjykim, do e rikthejë në SPAK apo do e pushojë dosjen. Data 15 mars ishte afati i fundit që kishte caktuar GJKKO ndaj SPAK për mbylljen e hetimeve të dosjes.