VOA/ SPAK: Hetimet për "Sterilizimin" s'kanë përfunduar ende

"Hetimet për koncesionin e sterilizimeve kirurgjikale në spitale nuk janë mbyllur ende, por janë drejt përfundimit", - tha dje për "Zërin e Amerikës", Prokuroria e Posaçme. I pyetur mbi ecurinë e hetimeve për sterilizimin, SPAK- u konfirmoi zyrtarisht se hetimet e kësaj çështjeje janë aktualisht drejt përfundimit, por ende vijojnë dhe nuk kanë përfunduar. Hetimet janë përqendruar mbi procedurat e dhënies së koncesionit prej 100 milionë eurosh për 10 vjet, pas dyshimeve për shpërdorim detyre, mashtrime dhe falsifikim dokumentesh. SPAK- u ka arrestuar prej 7 muajsh ishzëvendësministrin e Shëndetësisë, Klodian Rrjepaj dhe biznesmenin Ilir Rrapaj, ndërsa mban si person nën hetim ish- ministrin e Shëndetësisë, Ilir Beqaj. Nga gushti i vitit të kaluar, kur arrestoi ish- zëvendësministrin Rrjepaj dhe biznesmenin Rrapaj, SPAK- u po heton mbi shkeljet e dyshuara në procedurat e koncesionit për sterilizimin e instrumenteve kirurgjikale në spitalet shtetërorë, i cili iu dha kompanisë "Saniservice" si fituese nga Ministria e Shëndetësisë, më dhjetor 2015, pra mbi 8 vjet më parë. Rrjepaj dyshohet për shpërdorim detyre dhe falsifikim dokumentesh në bashkëpunim, ndërsa Rrapaj, biznesmeni që fitoi koncesionin, u arrestua nën dyshimet për mashtrim me pasoja të rënda. Ndërsa 6 zyrtarë dhe ekspertë, edhe pjesëtarë të komisionit të vlerësimit të ofertave janë po ashtu nën të njëjtat akuza për falsifikime dokumentesh dhe shpërdorim detyre.

Gjykata e Posaçme e Shkallës së Parë për Korrupsion dhe Krimin e Organizuar e orientoi SPAK- un, që të zgjeronte hetimet edhe për ish ministrin e Shëndetësisë, Ilir Beqaj, ish- ministrit të Financave, Shkëlqim Cani, si dhe 4 zyrtarëve të tjerë, që kanë pasur dijeni e lidhje për këtë koncesion, nëse kanë kryer shkelje ligjore. Person nën hetim për shpërdorim detyre është edhe ish- ministri i Shëndetësisë, Ilir Beqaj, i cili çdo të premte paraqitet në SPAK për pyetje dhe komunikime të tjera, ndërsa iu ndalua udhëtimi jashtë vendit. Ai po hetohet për shpërdorim detyre, ndërsa Gjykata e Posaçme ka vlerësuar se ekziston dyshimi, bazuar në faktet penale, që zoti Beqaj ka konsumuar edhe elementë të falsifikimit të vulave dhe formularëve dhe se ai ka qenë në dijeni të plotë të gjithë procedurave dhe dokumenteve, ku ka lejuar të pasqyrohen në studimin e fizibilitetit të dhëna të rreme lidhur me kostot e projektit dhe më pas u zgjodh koncesioni si procedurë më e favorshme se sa prokurimi publik. Zoti Beqaj nuk i ka pranuar akuzat, ndërsa hetimet flasin për fryrje në llogaritjet e kostove të sterilizimit, për të cilat ai dyshohet se si ministër i ka toleruar dhe nuk ka ndërhyrë për t'i anuluar. Ish ministri dyshohet se nuk mori masa për të vënë në punë Qendrën shtetërore të sterilizimit, as nuk vlerësoi nëse funksionimi i asaj qendre, pa ia kaluar koncesionarit, do të ishte më me leverdi ekonomike se sa kontrata e Partneritetit Publik- Privat, e cila parashikon sterilizim të personalizuar të pajisjeve kirurgjikale. Zoti Beqaj dyshohet se nuk ka vepruar për të shmangur konfliktin e interesit mes zëvendësit të tij Klodian Rrjepaj dhe biznesmenit Ilir Rrapaj, të cilët kishin njohje prej një kohe të gjatë. Prokuroria e Posaçme sekuestroi në shkurt disa pasuri të biznesmenit Ilir Rrapaj, 40 për qind të aksioneve të kompanisë "Saniservice", dy kompani ku ai është aksioner, dy llogari bankare, 13 automjete dhe një apartament banimi.

Ditët në vazhdim mbetet për t'u parë ecuria e hetimeve mbi çështjen, e cila fillimisht u regjistrua para tre vitesh nga SPAK- u si procedim mbi koncesionin e dhënë nga ministria e Shëndetësisë për sterilizimet mjekësore, që përfshin veprat penale "Shpërdorim detyre" në bashkëpunim, "Shkelja e barazisë së pjesëmarrësve në tendera apo ankande publike" në bashkëpunim, si dhe "Korrupsion pasiv i funksionarëve të lartë shtetërorë", disa nga të cilat nuk shihen deri tani në akuzat për të dyshuarit nën arrest.