Blinken: Të stabilizohen marrëdhëniet Kosovë- Serbi nëpërmjet dialogut
"Nuk duam një rikthim në vitet ' 90, të rritet transparenca me partnerët ndërkombëtarë"
Kthimi mbrapa në vitet ' 90 nuk duhet të ndodhë në rajon dhe s'i duhet askujt në Europë.
Kështu ka deklaruar Sekretari amerikan, Anttony Blinken, në një konferencë të përbashkët për media me kryediplomatin austriak, Alexander Schallenberg, duke iu referuar kështu situatës së tensionuar Kosovë- Serbi. Ai ka thënë se rajoni i Ballkanit Perëndimor është shumë afër zemrave të amerikanëve, në veçanti të Presidentit amerikan Joe Biden. "Është diçka që e kemi shumë afër zemrave tona dhe në veçanti Presidenti Biden, sepse për presidentin dhe për mua, kur unë fillova punën në vitet ' 90, fokus i madh i botës ishte në Ballkan, në Bosnje e në Kosovë dhe një gjë që nuk na duhet, që Evropës nuk i duhet dhe veçanërisht njerëzve të Ballkanit Perëndimor nuk u duhet, është kthimi prapa, ku ne e gjejmë veten në të ' 90- tat dhe duke iu falënderuar politikës së Austrisë, po shkojmë me vendosmëri në drejtim tjetër, në drejtim pozitiv, në të cilin Ballkani po integrohet vërtetë me Evropën", - ka thënë
Blinken. Më tej, Sekretari amerikan ka folur edhe për procesin e dialogut në mes të Kosovës dhe Serbisë, duke thënë se dialogu është i vetmi mekanizëm i zbatueshëm dhe ka thënë se SHBA- të dëshirojnë të shohin përpjekje në mirëbesim dhe qasje konstruktive nga të dyja palët, Kosova dhe Serbia, në normalizim të raporteve.
Blinken ka thënë se palët duhet të rrisin koordinimin, të rrisin transparencën me partnerët ndërkombëtarë dhe t'i zbatojnë marrëveshjet. "Atje, dialogu i lehtësuar nga BE- ja është mekanizimi i vetëm zbatueshëm, e vetmja rrugë e zbatueshme përpara, duhet të shohim përpjekje në mirëbesim dhe konstruktive nga të dyja palët, Kosova dhe Serbia, për t'i stabilizuar marrëdhëniet dhe të shkohet drejt asaj rruge. T'i mbajnë tensionet në nivel të ulët, të rrisin koordinimin, të rrisin transparencën me partnerët ndërkombëtarë, t'i zbatojnë të gjitha përkushtimet që janë në dialog", - ka deklaruar Antony Blinken.
TAKIMI MES KRYENEGOCIATORËVE
Zëdhënësi i Bashkimit Evropian, Peter Stano, ka konfirmuar se më 19 mars do të mbahet një takim i ri në kuadër të dialogut mes Kosovës dhe Serbisë. Takimi, sipas Stanos, do jetë në nivel të kryenegociatorëve, ku ndërsa mes tjerash do trajtohet edhe çështja e dinarit. "Të martën, përfaqësuesi special i BE- së, Miroslav Lajçak, ka ftuar kryenegociatorët, homologët e tij kryesorë, të vijnë në Bruksel për të vazhduar diskutimet. Pra, para së gjithash, të vazhdohet diskutimi, i cili tashmë ka filluar para disa javësh për vendimin e Bankës Qendrore të Kosovës për dinarin. Dhe do të ketë edhe pika të tjera për të diskutuar mes kryenegociatorëve nga Serbia dhe Kosova në Bruksel, të cilat janë çështjet më urgjente në kuadër të dialogut", - ka deklaruar zëdhënësi i BE- së, Peter Stano. Pjesë e diskutimeve pritet të jetë edhe zbatimi i marrëveshjes për normalizimin e marrëdhënieve mes Kosovës dhe Serbisë, e cila u arrit vitin e kaluar. BE- ja ka thënë se palët nuk kanë nisur ta zbatojnë atë. Kosova e akuzon Serbinë për pengim të kësaj marrëveshjeje, e cila prej 11 nenesh ndër tjerash parasheh edhe një nivel të vetëmenaxhimit për komunitetin serb në Kosovë dhe njohje të ndërsjellë të simboleve shtetërore, ndërsa kërkon nga
Prishtina dhe Beogradi që t'i zbatojnë, po ashtu, të gjitha marrëveshjet e mëhershme të arritura gjatë dialogut. "Është gjë e mirë që ka mirëbesim që të merremi me këtë çështje. Po ashtu, zbatimi i përgjithshëm i marrëveshjes për implementim nga Ohri është çështje urgjente dhe kjo do të jetë në rend dite", - theksoi Stano. Të gjitha këto takime, thonë burimet diplomatike në Bruksel, kanë për qëllim krijimin e atmosferës në të cilën mund të ketë përparim në zgjidhjen e probleme urgjente, e të tilla konsiderohen edhe përdorimi i dinarit në Kosovë dhe zbatimi i marrëveshjes për normalizimin e marrëdhënieve mes Kosovës dhe Serbisë.