Basha, përgjigje Ramës: PD, kundër kastës së vjetër të dinozaurëve të korrupsionit
Kryetari i Partisë Demokratike zyrtare, Lulzim Basha, e quan pazar me Sali Berishën, dakordësinë e arritur mes PS dhe ‘ Rithemelimit’ për rikthimin e jetës parlamentare. Me anë të një postimi në ‘ Facebook’, Basha shprehet se ky është një pazar edhe që kriminelet të garojnë në zgjedhje. Rama hodhi poshtë pretendimet e pazareve mes qeverisë dhe ‘ Rithemelimit’ dhe deklaroi se ka ardhur koha që të zhvillohet një debat publik lidhur me rrugën e anëtarësimit të Shqipërisë në BE. Basha shkruan se ‘ pazari për të mbrojtur plaçkën e ndryshimeve kushtetuese të vitit 2008 është i qartë’ dhe shoh se Rama së bashku me Berishën duan të zhbëjnë ligjin e dekriminalizimit, duke u hapur rrugë personave me precedentë penal dhe zyrtarëve të dënuar për korrupsion, që të kenë mundësi të kandidojnë në zgjedhjet e radhës. “Nuk është marrëveshje për anëtarësimin në BE, por është pazar i pastër mes rrangalleve të vjetra të tranzicionit, që duan të mbajnë peng Shqipërinë, duke ruajtur monopolin e sistemit, sepse vetëm ashtu mund të mbajnë njëri- tjetrin, sipas lojës 35- vjeçare, që i yti mishin të ha, por kockën ta ruan. Sot nuk ka shqiptar që beson përrallat e Edi
Ramës, i cili një ditë i quan idiotë ata që akuzojnë se po bën pazar, ndërsa të nesërmen vetë zyrtarizon pazarin me Sali Berishën, të cilin, kur s’i duhet e quan ‘ non grata’, ndërsa kur i hyn në punë, e quan partner për jetën parlamentare. Pazari për të mbrojtur plaçkën e ndryshimeve kushtetuese të vitit 2008 është i qartë, por përveç kësaj, së bashku ata duan edhe të zhbëjnë ligjin e dekriminalizimit, duke u hapur rrugë personave me precedentë penal dhe zyrtarëve të dënuar për korrupsion, që të kenë mundësi të kandidojnë në zgjedhjet e radhës. Edi Rama ka treguar se pa bashkëpunim me krimin e organizuar nuk mund të fitojë dot. Ashtu sikurse të dy janë të interesuar për t’i bërë presion drejtësisë së re, e cila ka premtuar se nuk do të kursejë askënd, pavarësisht hierarkisë apo pozicionit të lartë shtetëror. Partia Demokratike është e vendosur për një koalicion të gjerë me qytetarët dhe me të gjithë faktorët politikë që duan një Shqipëri të njerëzve dhe për njerëzit kundër kastës së vjetër 35vjeçare të dinozaurëve të korrupsionit.