Kërkesat e Ramës për grupin parlamentar, sot do të mbledhë drejtuesit e qarqeve

Kreu i mazhorancës mblodhi dje grupin parlamentar, ndërkohë që sot do të mbledhë drejtuesit e qarqeve. Fokusi i diskutimeve mes socialistëve ishte angazhimi i deputetëve në punët e partisë dhe në përpjekjet që po bën PS- ja për të rienergjizuar strukturat. Rama kërkoi një angazhim specifik nga ligjvënësit socialistë. “Në fjalën drejtuar deputetëve, kryeministri Rama kërkoi që të vijohet puna me organizatat socialiste në terren dhe të intensifikohet komunikimi me anëtarët e këtyre organizatave dhe qytetarët në çdo zonë”, - njoftoi PS. Në fokus të këtij takimi, ndër të tjera ishte dhe marrëveshja me opozitën për rikthimin e jetës normale parlamentare. Ndërkohë kreu i grupit, Bledi Çuçi, informoi deputetët për rikthimin e Parlamentit në normalitet, duke theksuar se s’ka asnjë marrëveshje e as do të krijohet ndonjë nënkomision ose strukturë e posaçme. “S’ka asnjë nënkomision apo strukturë tjetër, thjesht në Komisionin e Ligjeve do të krijohet një mekanizëm dialogu për ligjet me 3/ 5 dhe ato që kanë lidhje me çështjet e integrimit europian. Opozita u rikthye andej nga kishte ikur. Ramë dakord të ndryshojmë objektet e komisioneve hetimore në Konferencën e Kryetarëve”, - u shpreh Çuçi. Në vijim të mbledhjes diskutimet u ndalën te projektligjet që janë në rendin e ditës për seancën e së enjtes, ku mes të tjerash pritet të kalojë edhe Akti Normativ për ndryshimet në Ligjin e Buxhetit, projektligji “Për Sigurinë Kibernetike”, “Projektligji për disa ndryshime në Ligjin për Gardën e Republikës” etj. Por, diskutime ka pasur edhe për Amnistinë Penale. Në dalje nga Kryesia, kreu i qeverisë u pa duke diskutuar me ministrin e Drejtësisë, Ulsi Manja dhe mësohet se ka qenë pikërisht për këtë çështje. Amnistia pritet të diskutohet edhe në mekanizmin e grupit të punës që do të ngrihet te Komisioni i Ligjeve. Amnistia Penale të kalojë për votim në seancën plenare të javës së ardhshme, jo këtë të enjte. Që Amnistia Penale të miratohet në Kuvend duhen 84 vota, që deri më tani mazhoranca nuk i ka siguruar.