Todd D. Robinson në Shqipëri, forcim bashkëpunimi dhe mbështetje për SPAK

Ndihmëssekretari për Byronë Ndërkombëtare të Narkotikëve dhe Çështjeve të Zbatimit të Ligjit, Todd D. Robinson, ka mbërritur në Tiranë për një vizitë zyrtare ditën e djeshme. Sipas njoftimit të Departamentit Amerikan të Shtetit, ai do të qëndrojë në kryeqytet deri më 20 mars. Gjatë qëndrimit dyditor, Robinson do të takohet me kryeministrin Edi Rama, anëtarë të kabinetit të qeverisë, por edhe përfaqësues të organeve të drejtësisë kundër trafikut të narkotikëve. Gjatë këtyre takimeve, Ndihmëssekretari i Byrosë Ndërkombëtare të Narkotikëve pritet të njihet nga afër me sfidat e autoriteteve të drejtësisë, por edhe për të forcuar bashkëpunimin mes dy vendeve në këtë fushë. Vizita e Robinson, një diplomati karriere që në të kaluarën ka shërbyer në ambasadën e SHBA- ve në Tiranë prej vitit 2004 deri në vitin 2006, e më pas në Venezuelë, Bolivi dhe Spanjë, është një mesazh domethënës nga SHBA- të se po mbështet punën e Shqipërisë për forcimin e sundimit të ligjit, për luftën kundër korrupsionit dhe krimit të organizuar, si dhe për ndërtimin e institucioneve të forta. Zyrtari i lartë amerikan pritet që të ketë një takim edhe me drejtues të SPAK për t’u komunikuar atyre mbështetjen që të vijojnë në rrugën që kanë nisur si dhe të luftojnë korrupsionin në nivele të larta. Mesazh ky që është përcjellë shpesh nga

SHBA- të, që kanë mbështetur vazhdimisht reformën në drejtësi, që tashmë po tregon rezultate konkrete pasi shumë politikanë, ishministra e kryebashkiakë janë vendosur nën akuzë. Pas Tiranës, Robinson, sipas DASH, do të udhëtojë drejt Prishtinës, ku do të takohet me Presidenten e Kosovës, Vjosa Osmanin, si dhe me partnerët në sektorin e zbatimit të ligjit dhe drejtësisë.