Beqaj i pandehur, SPAK i komunikon akuzën për “Shpërdorim detyre”
Shkeljet me vlerë 100 milionë euro, ish- ministri i Shëndetësisë: Prokuroria nuk hetoi siç duhet, e vërteta do dalë në gjykatë!
Ish- ministri i Shëndetësisë, Ilir Beqaj, është zyrtarisht i pandehur për dosjen e sterilizimit. Beqaj u paraqit ditën e djeshme në Prokurorinë e Posaçme, ku iu komunikua akuza “Shpërdorim detyre”. Pas daljes nga ambientet e Prokurorisë, si gjithnjë ish- ministri nuk i ndaloi akuzat ndaj SPAK se në 50 muaj nuk ka hetuar siç duhet koncesionin e sterilizimit. Ai duke vijuar, tha se nëse hetimet do ishin bërë siç duhet, do të kishin dalë në konkluzionin se ky koncesion ka kursyer financat publike si edhe xhepat e qytetarëve shqiptarë. Ai mbrojti koncesionin e sterilizimit, duke thënë se 445 mijë shqiptarë janë operuar në kushte të sigurta, ndërsa u shpreh se të vërtetën e tij do e ballafaqojë në Gjykatën e Posaçme kur të nisë gjykimi.
“Për 50 muaj Prokuroria nuk mori mundimin të hetojë se përse nga prilli 2010 deri në shtator 2013, centrali i sterilizimi i blerë u mbajt në qese, ndërkohë që ISHP- ja kërkonte mbylljen e sallave të kirurgjisë në QSUT. Që nga fillimi i kontratës 445 mijë shqiptarë janë operuar në kushte të sigurta. Në 50 muaj prokurorët nuk qenë në gjendje të bënin dy vlerësime kryesore që bëhen për çdo PPP, vlera e parasë dhe si është materializuar ndarja e riskut mes privatit dhe publikut pas 8 vitesh zbatim konkrete” - tha Beqaj
REAGIMI I ISH- MINISTRIT
“Prokuroria në 50 muaj nuk ia doli të hetonte dy elemente kryesore që ka një proces sterilizimi, uljen e ditëve të qëndrimit të pacientëve në spital dhe uljen e ditëve të përdorimit të antibiotikut në spital. Nëse do të kishin bërë këtë vlerësim, që ne do kërkojmë të bëhet, atëherë konvertimi i këtyre kursimeve në para do e nxjerrë një proces në përfitim për financat publike dhe xhepat e qytetarëve”, - tha Beqaj. Ish- ministri deklaroi po ashtu se SPAK duhet të kishte hetuar se përse nga periudha prill 2010 deri në shtator 2013 nuk ishte vendosur në punë centrali i sterilizimit, kur ISHP- ja kërkonte mbylljen e sallave të kirurgjisë në QSUT.
“Për 50 muaj Prokuroria nuk mori mundimin të hetojë se përse nga prilli 2010 deri në shtator 2013, centrali i sterilizimi i blerë u mbajt në qese, ndërkohë që ISHPja kërkonte mbylljen e sallave të kirurgjisë në QSUT. Që nga fillimi i kontratës 445 mijë shqiptarë janë operuar në kushte të sigurta. Në 50 muaj prokurorët nuk qenë në gjendje të bënin dy vlerësime kryesore që bëhen për çdo PPP, vlera e parasë dhe si është materializuar ndarja e riskut mes privatit dhe publikut pas 8 vitesh zbatim konkrete. Unë të vërtetën time do ta përball në gjykatë, ku besoj se do dalë e vërteta e përfitimeve që kanë pasur shqiptarët nga sterilizimi”, - vijoi Beqaj.
HETIMI
SPAK ka marrë zyrtarisht të pandehur për dosjen e sterilizimit Beqajn dhe 8 të tjerë, këtyre të fundit iu komunikua akuza të premten e 15 marsit. SPAK pritet të dorëzojë dosjen në GJKKO me kërkesën për nisjen e gjykimit. Beqaj do të jetë në bankën e të akuzuarve së bashku me ishzëvendësin e tij në Ministrinë e Shëndetësisë, Klodian Rrjepajn dhe biznesmenin Ilir Rrapaj, që mori koncesionin e sterilizimit, të dy në burg që prej gushtit të kaluar, aty ku u janë komunikuar edhe akuzat. Zv. ministri akuzohet për “Shpërdorim detyre”, ndërsa biznesmeni për “Mashtrim”. Në gjykim do të shkojnë edhe 6 ish- zyrtarë të Ministrisë së Shëndetësisë, të cilët kanë qenë anëtarë të komisionit të tenderit të sterilizimit.
SPAK akuzon për shkelje në procesin e koncesionit të sterilizimit me vlerë 100 milionë euro dhe afat 10- vjeçar, të fituar nga biznesmeni Ilir Rrapaj. Prokuroria thotë se në dhënien e koncesionit të akuzuarit nuk kanë respektuar ligjin dhe kanë shpërdorur detyrën ndërkohë, që sipas akuzës, Ilir Beqaj ka pasur njohje dhe miqësi të fortë me biznesmenin Ilir Rrapajn. Ndër gjetjet e konstatuara nga SPAK janë edhe procedurat e ndjekura për fituesin, por edhe mosrealizimi i kushteve të parashikuara në kontratë.