Pagesat në euro, Banka e Shqipërisë gati rregulloren teknike për të hyrë në SEPA

Banka e Shqipërisë ka përgatitur projektrregulloren “Për përcaktimin e kërkesave për transfertat e kreditit dhe të debitimit direkt në euro”. Projektrregullorja në fjalë është përshtatje e rregullores së Parlamentit dhe Këshillit Europian të vitit 2012 “Për vendosjen e kërkesave teknike dhe të biznesit për transfertat e kredisë dhe debitimet direkte në Euro”. Ajo ka si objekt kryesor përcaktimin e kërkesave teknike për transaksionet e transfertave të kreditit dhe të debitimit direkt të kryera në monedhën Euro brenda Shqipërisë dhe ndërmjet Shqipërisë dhe zonës SEPA, ku si operatorit i Shërbimit të Pagesës ( OSHP- ja) e paguesit ashtu edhe e përfituesit janë në Shqipëri ose një nga OSHP- të është në Shqipëri dhe tjetri brenda zonës SEPA, ose i vetmi OSHP i përfshirë në transaksionin e pagesës ndodhet në Shqipëri. Rregullorja do të zbatohet edhe për transfertat e kreditit dhe debitimet direkte në Lekë, për aq sa është e mundur nga pikëpamja teknike dhe operacionale. Disa prej kërkesave kryesore teknike janë: Identifikuesi i llogarisë së pagesave duhet të jetë IBAN, standardi për formatin e mesazhit të pagesës duhet të j etë standardi ISO 20022 XML; fusha e të dhënave të dërgesave duhet të lejojë 140 karaktere.

Skemat e pagesave mund të lejojnë një numër më të madh karakteresh, përveç se në rastin kur paj isja e përdorur për dërgimin e informacionit ka kufizime teknike në lidhje me numrin e karaktereve, ku në këtë rast zbatohet kufiri teknik i pajisjes. informacioni i referencës së dërgesës dhe të gjithë elementët e tjerë të të dhënave të ofruara duhet të transmetohen plotësisht dhe pa ndryshime ndërmjet OSHP- ve në zinxhirin e pagesave; pasi të dhënat e kërkuara të jenë të disponueshme në formë elektronike, transaksionet e pagesave duhet të lejojnë përpunimin plotësisht të automatizuar elektronik në të gjitha fazat e procesit në të gjithë zinxhirin e pagesave ( nga fundi- në- fund, direkt nëpërmjet përpunimit), duke mundësuar kryerjen e të gjithë procesit të pagesës në mënyrë elektronike pa pasur nevojë për përdorimin përsëri të çelësave ose ndërhyrje manual, skemat e pagesave nuk duhet të vendosin asnjë kufi minimal për shumën e transaksionit të pagesës që lejon transfertat e kreditit dhe debitimet direkte, etj. Për pagesat që nuk janë pjesë e SEPA- s, Këshilli Mbikëqyrës mund të vendosë kërkesa të ndryshme nga përcaktimet e bëra në këtë rregullore.

Me qëllim aplikimin për pjesëmarrje në SEPA, OSHP- të, që janë subjekt i kësaj rregulloreje, duhet të marrin masat e nevojshme që të përshtatin aktivitetet dhe funksionimin e tyre me kërkesat e kësaj rregullore, brenda 180 ditëve nga miratimi i zgjerimit të shtrirjes gjeografike SEPAs në Shqipëri nga Këshilli Evropian i Pagesave. Anëtarësimi i Shqipërisë dhe i vendeve të tjera të Ballkanit Perëndimor në Zonën e Vetme të Pagesave në Euro ( SEPA) është një vendim strategjik i BE- së, si pjesë e procesit të integrimit europian të vendeve të rajonit. Anëtarësimi në SEPA pritet të sjellë lehtësi të mëdha në kryerjen e pagesave ndërkombëtare me kosto më të ulëta dhe në kohë më të shpejtë. Aktualisht, sektori bankar në Shqipëri i ekzekuton transfertat ndërkombëtare nëpërmjet bankave të huaja korrespondente. Një zgjidhje e tillë sjell komisione të larta dhe kohë relativisht të gjatë për kryerjen e transfertave.