Projektligji i PD- së: Pensioni minimal 300 euro deri më 2029- ën
Bardhi: Do të ketë rritje progresive. Të moshuarit të trajtohen me dinjitet
Deri në vitin 2029 nuk duhet të ketë pensione më të ulëta se 32 mijë lekë apo 300 euro. Kështu thuhet në projektligjin e depozituar dje në Kuvend nga grupi parlamentar i Partisë Demokratike. Kreu i grupi të PD- së, Gazment Bardhi, në një deklaratë për mediat, tha se ky projektligj synon rritjen e pensioneve minimale, veçanërisht ato në zonat rurale. "Grupi parlamentar i Partisë Demokratike ka ndërmarrë një nismë ligjore, që synon rritjen e pensioneve minimale, veçanërisht pensionistëve në zonat rurale, duke vendosur një standard minimal të masës së përfitimit, pavarësisht llojit të pensionit, si dhe duke zhbërë ato parashikime ligjore, që e kufizojnë të drejtën e përfitimit të pensionit me tërheqjen ose jo të tij gjatë tri viteve të fundit", - tha Bardhi. Më tej, ky i fundit nënvizoi se trajtimi dinjitoz i një prej shtresave më vulnerabël të vendit është një tregues i një shoqërie të emancipuar. "Trajtimi dinjitoz i një prej shtresave më vulnerabël të vendit është një tregues i një shoqërie të emancipuar, në paqe sociale dhe ku vlerësohet drejtë puna dhe sakrificat shumëvjeçare të bashkëqytetarëve tanë. Konkretisht, ndërhyrja në ligj synon që të vendosë një standard minimal për masën e përfitimit të pensionit në vendin tonë, pavarësisht llojit të këtij pensioni, duke filluar nga viti 2024 në masën e pensionit mesatar rreth 18 mijë lekë dhe duke vijuar në progresion rritës për 5 vitet e ardhshme, me qëllim që në vitin 2029 të mos ketë pensione më të ulëta se 32 mijë lekë ( rreth 300 euro)", - nënvizoi kreu i grupit Parlamentar të Partisë Demokratike.
Konkretisht, ndërhyrja në ligj synon që të vendosë një standard minimal për masën e përfitimit të pensionit në vendin tonë, pavarësisht llojit të këtij pensioni, duke filluar nga viti 2024 në masën e pensionit mesatar rreth 18 mijë lekë dhe duke vijuar në progresion rritës për 5 vitet e ardhshme, me qëllim që në vitin 2029 të mos ketë pensione më të ulëta se 32 mijë lekë ( rreth 300 euro)", - nënvizoi kreu i grupit Parlamentar të Partisë Demokratike.
KRAHASIMI ME RAJONIN
Më tej, duke bërë një krahasim me rajonin, Gazment Bardhi ka deklaruar se masa e kërkuar e pensionit minimal në projektligj është në disa raste edhe më e ulët se masa e pensionit aktual që marrin vendet e rajonit. "Kjo masë përfitimi është pothuajse e barabartë dhe në disa raste më e ulët se përfitimet që kanë pensionistët në vendet e rajonit si Kosova ( 309 euro), Mali i Zi ( 425 euro), Maqedonia e Veriut ( 320 euro) dhe Serbia ( 390 euro). Qeveria shqiptare i ka mundësitë financiare për t'i përballuar këtë kosto financiare, nëse fondet e saj nuk do t'i alokojë për mobilime zyrash, blerje makinash, karburant ( konkretisht ulja me 25% e shpenzimeve operative të qeverisjes qendrore), si dhe tendera e koncesione që pasurojnë oligarkët, por që mbështesin shtresën e pensionistëve për t'u ushqyer më mirë, për t'u kujdesur për shëndetin dhe për të përballuar kostot e jetesës", - bëri të ditur kreu i grupit parlamentar të PDsë, Gazment Bardhi. Aktualisht janë më shumë se 14 mijë persona që çdo vit mbushin moshën e daljes në pension. Formula e re përcakton një pension bazë dhe shtesën. Pensioni bazë është rreth 8800 lekë, ndërsa shtesa bazuar në formulën e llogaritjes së pensionit është 1 për qind për çdo vit sigurimi, shumëzuar me bazën mesatare të vlerësueshme, që personat e siguruar kanë arritur nëpërmjet kontributeve të paguara. Baza e vlerësueshme është paga e përfituar pas indeksimit me koeficientet korresponduese të çdo viti. Shuma e përgjithshme e pensionit nuk mund të jetë më e vogël se pensioni social. I siguruari, i cili ka plotësuar kushtet për pension pleqërie, sipas nenit 92, të këtij ligji, merr shtesë në masën 0,5 për qind të pensionit për çdo muaj që shtyn datën e daljes në pension dhe vazhdon të paguajë kontribute. Përfituesi i pensionit të pleqërisë, që ndërpret pensionin, vazhdon të punojë dhe paguan kontribute, merr shtesë mbi pension në masën 0,5 për qind për çdo muaj ndërprerjeje. Kjo shtesë llogaritet mbi atë masë pensioni që rezulton pas rritjeve dhe indeksimit që ka pësuar pensioni gjatë kohës së ndërprerjes.