Shembja e aksit KorçëErsekë, Meta: Balluku të thirret në interpelancë

Kreu i Partisë së Lirisë, Ilir Meta, njoftoi dje se deputetët e partisë së tij do të thërrasin në interpelancë ministren e Infrastrukturës, Belinda Balluku, për aksin e shembur Korçë- Ersekë. Meta, i cili e ka parë nga afër aksin, tha se e gjithë qeveria duhej të kishin shkuar atje, ndërsa u shpreh se vjedhja që bëhet është mizore, duke rrezikuar dhe sigurinë e qytetarëve. “E gjithë qeveria dhe shteti duhet të kishin qenë te ura e rrugës Korçë- Ersekë, për të cilën kryeministri premtoi se do të inaugurohej së shpejti. Falë Zotit rruga ra pa kaluar autobusë e makina të tjera për të dëshmuar se ‘ rilindja’ i fryn kostot e rrugëve qëllimisht për të vjedhur në një mënyrë mizore, duke rrezikuar dhe sigurinë e qytetarëve, sepse unë e paralajmërova atë që do të mund të ndodhte një javë para se të ndodhte, sepse është e qartë. Kushdo që ka kaluar atje, e ka parë sesi tundet e shkundet makina. Isha vetë këto dy ditë, sepse ndodhi një shembje e dytë. Ishte një gjë e tmerrshme, sepse atje duket qartë që s’ka shtresa nënshtresa, gurë, çakull, por vetëm kashtë dhe një tegel asfalt sipër. Mirë ata që e kanë bërë, por kush është ai supervizor që ka marrë përsipër për të certifikuar punime të tilla. Është e qartë se rrugët janë instrumenti sesi ‘ rilindja’ të vjedhë dhe të zhvatë sa më shumë me të ashtuquajtura investimet publike. Dihet që të gjithë këta persona janë thjeshtë bedelë të një korrupsioni që drejtohet dhe komandohet nga vetë Edi Rama dhe sa herë i duhet të devijojë vëmendjen nga çështje të caktuara, sakrifikon drejtorë”, - deklaroi Meta. “Për rrugën Korçë- Ersekë do të ketë interpelancë të posaçme me ministren e Infrastrukturës dhe do të shohim mundësitë për shumë çështje të tjera. PL ka qenë dhe është shumë aktive duke bërë dhe denoncime”, - tha Meta. Kreu i PL u pyet dhe për kthimin e “Albcontrol” nga një shoqëri aksionere në një shoqëri shtetërore. Ai tha se është një përpjekje e Ramës për të fshehur përgjegjësitë penale. “Përpjekje për të fshehur përgjegjësitë penale të Ramës dhe atyre që përzunë në mënyrë të dhunshme Becchettin. Në kundërshtim me ligjet dhe garancitë ligjore që ky investitor kishte marrë nga shteti shqiptar. Përpjekje për të fshehur faktin që është Rama përgjegjësi që po penalizohet taksapaguesi shqiptar. Do të diskutohet kjo çështje edhe në Parlament kur projektligji të vijë në Kuvend”, - tha Meta.