Nga 1 korriku, rritje të pagave e pensioneve, kush përfiton
Mete: “Paga 900 euro për sektorin publik arrihet këtë vit, në muajin prill finalizohet vendimi me detajet e rritjes për 2024"
I kënaqur me performancën ekonomike përgjatë vitit 2023, ministri i Financave, Ervin Mete, premtoi që brenda këtij viti do të finalizohet premtimi i qeverisë për ta çuar në 900 euro pagën mesatare në vend, ndërkohë që pensionistët nuk do të marrin përveçse indeksimit të detyruar vjetor.
Duke prezantuar Aktin Normativ për ndryshime në buxhet, nga foltorja e Kuvendit të Shqipërisë, Mete nënvizoi se do të bëhen disa ndryshime sa u përket të ardhurave dhe shpenzimeve, për të reflektuar rritje të të ardhurave dhe optimizim të shpenzimeve, si dhe duke ulur në të njëjtën kohë deficitin buxhetor.
PAGAT E REJA
Një rritje e dytë pagash për buxhetorët do të realizohet në mes të verës. Në fillim të gushtit, bluzat e bardha, mësuesit, forcat e mbrotjes e të rendit, si dhe disa nivele zbatuese në administratë do të mund të marrin shtesë mbi pagën mujore. “Buxheti 2024 do të vijojë mbështetjen për një rritje domethënëse të pagave, duke bërë të mundur që brenda vitit 2024 të realizohet objektivi i vendosur për një nivel page mesatare prej 900 euro në muaj. Brenda muajit të ardhshëm pritet që të finalizohen VKM- të që do të detajojnë këto rritje të pagave, që fillojnë nga 1 korriku i vitit 2024. Ky buxhet parashikon rritjen e mëtejshme të pagave për mjekët e përgjithshëm, infermierët dhe punonjësit e tjerë shëndetësorë, mësuesit në arsimin parauniversitar, forcat e rendit, të mbrojtjes, si edhe punonjësit e niveleve zbatuese në administratën qendrore. Gjithashtu, synojmë të mbështesim rritjen e pagave edhe për punonjësit e pushtetit vendor”, deklaroi Mete nga parlamenti. Jo pa mburrje deklaroi atë çfarë është dhënë për pensionistët në formë bonusi si pasojë e inflacionit të shtuar. Bëhet fjalë vetëm për indeksim dhe i njëjti trajtim do të jetë edhe
në vazhdim. “Financohet gjithashtu indeksimi i mëtejshëm i pensioneve, si dhe shpërndarja e bonusit të fundvitit për pensionistët, ku përfitojnë 717 mijë pensionistë. Për indeksimin e
pensioneve gjatë dy viteve të fundit, buxheti ka alokuar afro 30 miliardë lekë, shifër kjo e konsiderueshme, duke marrë parasysh efektin e përhershëm në vitet në vijim”.
MINISTRITE DHE BASHKITE
Një pjesë buxheti do të alokohen edhe për mbrojtejn sociale, si dhe investime në disa sektorë. “Gjithashtu, me konsulencën e
Bankës Botërore, po analizojmë komponentët e mbrojtjes sociale për një tjetër qasje reformuese, me qëllim rritjen e mëtejshme të mbështetjes për këto kategori, si edhe sigurimit të një raporti sa më të drejtë mes nivelit të kontributeve dhe përfitimeve në skemën e pensioneve. Sektorët e Arsimit dhe Shëndetësisë do të vijojnë të financohen në nivelin mbi 3% të PBB- së, duke mbështetur jo vetëm rritjen e pagave për arsimtarët dhe punonjësit shëndetësorë, por edhe përmirësimin e mëtejshëm të infrastrukturës arsimore e spitalore, për shërbime më cilësore për qytetarët. Për sektorin e Mbrojtjes për herë të parë arrihet objektivi madhor i lidhur me angazhimet e marra në kuadër të NATO- s duke e çuar buxhetin e mbrojtjes në 2% të PBB- së. Ky buxhet, siç e theksova, do të financojë rritjen e nivelit të pagave për personelin ushtarak si dhe modernizimin e Forcave të Armatosura në armatime dhe pajisje ushtarake. Vijon mbështetja për drejtësinë, sektor i mbështetur në mënyrë prioritare që nga
ndërmarrja e reformës në drejtësi. Buxheti i vitit 2024 parashikon rreth 26.2 miliardë lekë për këtë sektor ose rreth 94% më shumë se viti 2016, kur nisi implementimi i reformës”, bëri me dije ministri.
Sa u takon shpenzimeve të pushtetit vendor për këtë vit janë parashikuar në masën 71.4 miliardë lekë, me një rritje prej 10.4% në raport me buxhetin e vitit 2023. “Pjesë e rëndësishme e buxhetit të pushtetit vendor është granti i qeverisjes qendrore për njësitë vendore në masën 36.5 miliardë lekë. Transferta e pakushtëzuar për vitin 2024 është në masën 24.3 miliardë lekë, transfertë e cila është dyfishuar, krahasuar me vitin 2015, kur nisi reforma administrativo- territoriale”.
Këto shpenzime, shtoi ministri, parashikohet të realizohen duke vijuar në të njëjtën kohë konsolidimin fiskal, duke projektuar një trend rënës të borxhit publik, si edhe duke zbritur më tej, me këtë akt normativ, me 4 miliardë lekë, deficitin buxhetor.