SPAK merr të pandehur Arben Ahmetajn, Klodian Zoton dhe Mirel Mërtirin
Drejt përfundimit të hetimit për ish- zv. kryeministrin, SPAK thërret edhe ish- gruan e tij dhe avokatët e Mërtirit e Zotos
Ish- zv. kryeministri Arben Ahmetaj merret i pandehur për aferën me inceneratorin e Elbasanit.
SPAK nisi dje komunikimin e akuzave ndaj Arben Ahmetajt, Klodian Zotos dhe Mirel Mërtirit, lidhur me fraksionin e ndarë të inceneratorit të Elbasanit. Ish- numri dy i qeverisë është nën hetim për procedimin penal 277/ 1 për veprat penale "Mosdeklarim, deklarim të rremë dhe fshehje të pasurisë", vetëm dhe në bashkëpunim, "Korrupsion pasiv të funksionarëve të lartë shtetërorë ose të zgjedhurve vendorë" në gjashtë raste, "Pastrimit të produkteve të veprës penale ose veprimtarisë kriminale". Ai dyshohet se ka ndërmarrë një mori aktesh në funksionet e tij si ministër, për t'u mundësuar këtyre sipërmarrësve lidhjen e kontratave koncesionare. Prokuroria e Posaçme pas përfundimit të hetimeve ndaj ishzv. kryeministrit Arben Ahmetaj, akuzat të cilit do t'ia komunikojë më 26 mars, ka marrë në pyetje ish- gruan e tij, Albina Mançka. Oficeri i BKH e informoi avokatin që të njihet me aktet e dosjes. Ish- zv. kryeministri ndodhet në arrati dhe sipas SPAK, ka përfituar ryshfet nga bosët e inceneratorëve, si pasuri të paluajtshme dhe në formën e dhuratave apo pagesës së udhëtimeve. Arben Ahmetaj si ish- ministër i Financave dhe Ekonomisë u vendos nën hetim për dosjet e inceneratorëve, mbas këqyrjeve në një kompjuter që i përket Klodian Zotos, i cili rezultoi se kishte paguar e prenotuar udhëtime luksoze për ishfunksionarin, vlera e të cilave u llogarit nga SPAK në shumën e 34 mijë eurove. Për hetimet, SPAK i referohet një sërë dëshmish të biznesmenëve, që tregojnë se vilat në Palasë dhe në Hamallaj janë të lidhura me Arben Ahmetajn ndërkohë që nga një telefon "Blackberry" i sekuestruar janë përftuar mesazhe dhe komunikime edhe me persona të tjerë, zyrtarë ish- zyrtarë dhe biznesmenë.
DOSJA PËR ARBEN AHMETAJN
Janë mbi 300 faqe dosje që sipas SPAK zbulojnë udhëtimet e hetuara nga SPAK të Arben Ahmetaj dhe të afërmve të tij, për periudhën 2013- 2017. SPAK thotë se Ahmetaj për vete e të afërmit ka përfituar 34 mijë euro në formën e shpenzimeve për udhëtimet nga Klodian Zoto dhe Mirel Mertiri, ndërsa këta kanë përfituar kontrata. Bëhet fjalë për 14 udhëtime dhe qëndrime në hotele luksoze nga Milano të Italisë në Monako, Vjenë të Austrisë, Frankfurt të Gjermanisë dhe Francë nga viti 2013- 2017. Ahmetaj u emërua në postin e ministrit të Zhvillimit Ekonomik, Tregtisë dhe Sipërmarrjes në shtator 2013, ndërsa SPAK në dosje thuhet se më 10 korrik 2013 në hotelin "Principe di Savoia", në Milano janë paguar 1535 euro për Arben Ahmetajn dhe Erjola Hoxhën dhe miken e Erjolës. Më pas, më 15 korrik 2013, Ahmetaj dhe bashkëjetuesja e tij Erjola Hoxha me shoqen e saj kanë qëndruar në hotelin "Hermitage" në Monako ku janë paguar 3156 euro. Ndërkohë, më 19 korrik 2016 janë paguar 10 600 euro për hotel "SPA Tiara Miramar" me pesë yje që gjendet në Cote d'azur ose Bregu i Kaltër, një segment i bregdetit të Francës në Mesdhe. Shpenzimet më të mëdha të "luksit" janë kryer gjatë vitit 2016 me 15 228 euro. Në dosje rezulton se edhe ish- ministri Damian Gjiknuri ka qenë në një hotel me Arben Ahmetajn në Frankfurt të Gjermanisë për të cilin janë paguar 1052 euro, por vetë Gjiknuri ka mohuar më herët të ketë përfituar pagesa hotelesh nga Zoto. "Ekziston dyshimi i arsyeshëm i mbështetur në prova se shtetasi Arben Ahmetaj për vete ose të afërmit e tij ka përfituar në mënyrë të padrejtë një shumë prej 34 422 euro, në formën e shpenzimeve për udhëtime. Kjo shumë, ekziston dyshimi se është përfitim i paligjshëm, dhënë këtij shtetasi, si rezultat i ushtrimit të funksionit te tij si deputet apo ministër, që ka sjellë për pasojë lidhje kontratash përfituese për shtetasit Klodian Zoto dhe Mirel Mertiri. Përsa më sipër, ekziston dyshimi se shtetasi Arben Ahmetaj ka konsumuar veprën penale të ' Korrupsionit pasiv te funksionarëve të lartë shtetërore ose i të zgjedhurve vendore' parashikuar nga neni 260 i Kodit Penal", - thuhet në dokumentin e SPAK.