Studentët e "Luarasit", fitues në konkursin nga Komiteti i Helsinkit
"Jo korrupsionit, po demokracisë", projektligji që rrëmbeu çmimin e parë
"Përsa i përket unifikimit të praktikës gjyqësore, do të pilotohet me mbështetje të ambasadës suedeze, ku studentët tanë do të kenë mundësi që të bëjnë propozimet e tyre në draftime dhe në propozime të ligjeve të ndryshme deri në Kuvendin e Shqipërisë", - tha pedagogu Lisien Damini.
Me votim unanim nga ana e jurisë profesioniste, kazusi i "Luarasit" u zgjodh si më i miri, gjë që u hap rrugë studentëve për pilotimin e rastit konkret pranë institucioneve kompetente. "Është një konkurs me debate, risia e të cilit ishte një kazus nga praktika, e cila kishte nevojë për rishikim në mënyrë të përmirësimit të praktikës ligjore", - tha Lorenca Bejko, pedagoge në Fakultetin e Drejtësisë, në "Luarasi". Studentët e Fakultetit të Drejtësisë së universitetit "Luarasi" treguan jo vetëm njohuritë e tyre të thelluara akademike, por edhe angazhimin e palëkundur në ndërtimin e një shoqërie më të drejtë dhe transparente. "Ky konkurs nuk ishte si gjithë të tjerët, pasi rasti konkret që ne propozuam në ndryshime të dy neneve të caktuara të Kodit Penal po dhe me propozimet e jurisë për sa i përket unifikimit të praktikës gjyqësore do të pilotohet me mbështetje të ambasadës suedeze, ku studentët tanë do të kenë mundësi që të bëjnë propozimet e tyre në draftime dhe në propozime të ligjeve të ndryshme deri në Kuvendin e Shqipërisë", - tha pedagogu Lisien Damini. Projekti Universiteti "Luarasi", prej kohësh një emër suksesi në arsimin e lartë, vijon të ruajë traditën e titujve në konkurse kombëtare e ndërkombëtare, përmes arritjeve të brezit të ri. "Propozimi ynë konkret ishte amendimi i neneve 259 dhe 248 ' Korrupsioni pasiv dhe shpërdorimi i detyrës' dhe ligji 90/ 49 te 2003 ' Për deklarimin e pasurive'. Synimi pra i ndryshimit ishte shmangia e mbivendosjes dhe ngjashmëria midis nenit 259 dhe 248, por gjithashtu edhe gjurmimi i parave që deklarohen nga nëpunësit shtetërorë", - nënvizoi Fausta Gjika, një ndër studentët që morën pjesë në konkurs. Sakaq, një tjetër studente e vlerësoi konkursin e debatit jo si një rast të simuluar, por si një rast që do të pilotohet në të ardhmen. "Nuk ishte një debat apo një rast i simuluar, si rastet e tjera që ne kemi qenë pjesëmarrës, por ishte një rast që do të pilotohet në të ardhmen, pra ne si studentë do të kemi mundësinë që të bëjmë një propozim për hartimin e një projektligji dhe zëri ynë do të dëgjohet në instanca më të larta", - u shpreh Semela Dedndrenaj, studente në Fakultetin e Drejtësisë. Një tjetër pjesëmarrëse në projekt theksoi se ky konkurs, ku studentët e "Luarasit" morën pjesë, kishte një natyrë tjetër, pasi lidhej më propozimin e një projektligji. "E rëndësishme për t'u theksuar ishte se këtë herë ishte një projekt i një natyre ndryshe nga projektet e tjera. Kjo, pasi këtë herë ne patëm mundësinë të propozonim një projektligji, i cili më pas gjithashtu do të pilotohet", - tha studentja Venera Zyla. Shpallja fitues në konkursin e debatit e çon kazusin e studentëve të Drejtësisë te "Laurasi" drejt një hapi tjetër, drejt një të ardhmeje ku drejtësia dhe demokracia nuk cenohen.