Efektivi qëllon me armën e shërbimit, plagoset kreu i "Transportit Ndërqytetas"
AMP jep detajet e sekuestrimit të 1 kg kokainë në mjetin e 3 të rinjve: Predha e armës shpoi derën e mjetit ku transportohej droga
Pak para mesnatës së të enjtes, tre efektivë të Antidrogës kërkojnë që një automjet të ndalohet.
Ndalimin e kërkojnë në hyrje të Rrugës së Kavajës, ndërkohë që drejtuesi i mjetit nuk e ka pritur mirë urdhrin e punonjësve të policisë. Sipas të dhënave, mësohet se në fakt, policia kishte informacion në lidhje me mjetin që po lëvizte një sasi kokaine në drejtim të rrugës "Mihal Duri". Në mjetin e që policia kishte informacionin për drogë gjendeshin tre persona, ndërkohë që dyshohet se në rrugën "Mihal Duri" po i priste personi që do ta blinte mallin. Ai iu shpëtoi prangave, ndërkohë që në hyrjen e Rrugës së Kavajës ndodhi një ngjarje e rëndë. Drejtuesi i mjetit refuzoi jo vetëm të dilte nga makina, jo vetëm të lejonte të ushtrohej kontroll ndaj makinës, por ka nisur të kryejë veprime të çuditshme. Oficerët antidrogë kanë këmbëngulur që ai të ndalonte dhe të dilte nga mjeti, por drejtuesi i mjetit ka kaluar makinën në indietro dhe ka tentuar të përplasë tre punonjësit e policisë. I zënë në habi, njëri nga oficerët ka nxjerrë armën dhe ka tentuar gomën e parë, por lëvizja e mjetit ka bërë që plumbi të kapë derën e shoferit dhe për fatin e tij dhe të efektivit të policisë, plumbi e ka kapur në këmbë. I riu, që më pas rezultoi të ishte drejtues i Transportit Ndërqytetas është dërguar menjëherë në spital ku mësohet se është jashtë rrezikut për jetën.
POLICIA PËR NGJARJEN
Policia në Tiranë ka kryer një operacion antidrogë, teksa u kap 1 kilogram kokainë dhe në pranga kanë përfunduar shtetasit Enea Sulejmani, Igli Begaj 20 vjeç dhe Shkëlqim Ostreni 26 vjeç.
AMP me anë të një deklarate për mediat, ka dhënë detaje nga operacioni. Bëhet me dije se mes të arrestuarve
dhe policisë ka pasur një përplasje. Për shkak të rezistencës ndaj policisë, efektivët kanë përdorur armë zjarri. Plumbat kanë shpuar derën e makinës ku transportohej droga, ku i plagosur ka mbetur shtetasi Enea Sulejmani. Në datë 21.03.2024, në rrugën "Mihal Duri" Tiranë, strukturat për Hetimin kundër Narkotikëve pranë Drejtorisë Vendore të Policisë Tiranë, gjatë veprimeve policore në funksion të një procedimi penal, me qëllim arrestimin e disa personave të dyshuar për veprën penale "Prodhim dhe shitje narkotikësh", e kryer në bashkëpunim, kanë hasur në kundërshtimin dhe mosbindjen e disa shtetasve, ku njëri prej tyre, duke drejtuar automjetin tip "Tiguan", në tentativë për t'u larguar, ka kryer manovra të rrezikshme duke goditur dhe duke u bërë rrezik serioz për jetën e disa punonjësve të policisë, si dhe ka shkaktuar dëme materiale një automjeti të Policisë së Shtetit. Agjencia e Mbikëqyrjes Policore, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë po kryen të gjitha veprimet e nevojshme hetimore procedurale përfshirë këqyrjen dhe analizimin e pamjeve filmike të vendit të ngjarjes, me qëllim evidentimin dhe verifikimin e proporcionalitetit të veprimeve policore, nëse ato kanë qenë në tejkalim të mbrojtjes së nevojshme. Nga hetimet e deritanishme rezulton se gjatë
kryerjes së veprimeve policore, me qëllim arrestimin e personave të dyshuar, punonjësit e Policisë u kanë bërë disa herë thirrje personave të dyshuar të ndalonin tentativat për t'u larguar dhe në kushtet kur drejtuesi i mjetit nuk është bindur, duke kryer manovra me rrezikshmëri të lartë për jetën e punonjësve të Policisë, është përdorur armë zjarri për neutralizimin e mjetit. Për shkak të veprimeve intensive të punonjësve të Policisë si dhe lëvizjeve të çrregullta të automjetit, predha e armës, ka shpuar pjesën e derës së drejtuesit të automjetit dhe si rezultat është plagosur shtetasi E. S., i cili ndodhet nën kujdesin e mjekëve në Spitalin e Traumës, jashtë rrezikut për jetën. Lidhur me ngjarjen, Agjencia e Mbikëqyrjes Policore ka arrestuar në flagrancë tre shtetas, me iniciale E. S., SH. O., I. B., si edhe u shpall në kërkim shtetasi M. H., si të dyshuar për veprat penale "Prodhim dhe shitje të lëndëve narkotike", "Kundërshtim i punonjësit të policisë" dhe "Mosbindja ndaj punonjësve të policisë". Vijojnë hetimet për sqarimin e plotë të rrethanave të ngjarjes.