Mesazhi: E papranueshme që shumë katolikë janë në burg për trafik droge!

Arqipeshkëvi i Shkodrës, Angelo Massafra, tha se shumë katolikë në Shqipëri janë në burgje për shkak të përfshirjes së tyre në trafikun e drogës dhe kjo është e papranueshme. Gjatë meshës për ditën e larit në katedralen “Shën Shtjefni”, Arqipeshkëvi Massafra përmendi edhe rastet e vetëvrasjeve, të cilat po kthehen në një shqetësim për shkak të numrit të lartë. “Shpeshherë këto fatkeqësi - shtoi Massafra - ndodhin nga pesha e opinionit tek individi”. Ndërkohë Arqipeshkëvi i Shkodrës një ditë më parë mbushi 75- vjetorin e lindjes duke dhënë kështu dorëheqjen në krye të kësaj dioqeze për shkak të moshës së pensionit. Gjatë një koncerti në katedrale dha lajmin e dorëheqjes. Vatikani ka pranuar dorëheqjen e Arqipeshkëvit, i cili sipas një dekreti të ardhur nga Selia e Shenjtë dhe të firmosur nga Nunci Apostolik në Shqipëri, Luigi Bonazzi, do të vijojë të qëndrojë në detyrë deri në emërimin e Arqipeshkëvit të ri të Shkodrës. Angelo Massafra prej 27 vitesh drejton dioqezën Shkodër- Pult duke kaluar kështu një rrugëtim të gjatë mes shumë vështirësive në gjithë këto vite të trazuara për vendin tonë.

Kështu, Nunci Apostolik në Shqipëri, imzot Luigi Bonazzi, njoftoi imzot Massafran për pranimin e dorëheqjes, me një shkresë që mban datën 22 shkurt 2024. “Shkëlqesi, po ju vë në dijeni se Ati i Shenjtë e ka pranuar dorëheqjen nga qeverisja baritore e Arqidioqezës së Shkodër- Pultit, të paraqitur nga ju në përputhje me Kanunin 401/ 1 të Kodit të së Drejtës Kanonike, me formulën ‘ nunc pro tunc’. Prandaj, Ju lutet që të vazhdoni ta udhëhiqni selinë e ShkodërPult derisa të emërohet Pasuesi Juaj”. Pas pranimi të dorëheqjes së tij nga detyra e Arqipeshvit të Dioqezës Shkodër- Pult ai tha: “Ju falënderoj të gjithëve që më doni dhe unë ju dua ju. Jeta ime është për ju për kishën tonë. Në çdo aspekt nuk kursehem”, - ka thënë Massafra. “Duke shfrytëzuar kushtin e dëgjesës, pranova këtë detyrë për të qenë Ipeshkv. Dioqeza ecën përpara jo vetëm me punën time, është puna e të gjithëve”, - tha më tej ai. Imzot Angelo Massafra është shuguruar Ipeshkëv nga Papa Gjon Pali i Dytë më 6 janar 1997 në Vatikan dhe ka shërbyer më shumë se 27 vite në Shqipëri. Arbëresh me origjinë, imzot Massafra tashmë është zyrtarisht edhe shtetas i Republikës së Shqipërisë dhe deri disa javë më parë, ka qenë President i Konferencës Ipeshkvnore të Shqipërisë. Imzot Massafra ka festuar 75vjetorin e lindjes ku ne Katedralen e Shkodrës u mbajt një koncert nga “Nova Chamber Orchestra”.