“Standard & Poor’s” rrit për herë të parë vlerësimin financiar për Shqipërinë
“S& P” e ngjit në “BB-” vlerësimin financiar, duke vënë theksin në përmirësimin e pozicionit të jashtëm të vendit dhe atij fiskal
Agjencia e vlerësimit të kreditit “Standard & Poors”, një nga tre më të mëdhatë në botë, ka rritur për herë të parë me një kategori, vlerësimin afatgjatë të kreditit sovran të Shqipërisë, duke vënë në dukje përmirësimin e pozicionit fiskal dhe pozicionit të jashtëm të vendit.
Në raportin e bërë publik më 22 mars 2024, “Standard & Poors” përmirësoi vlerësimin afatgjatë të kreditit sovran të Shqipërisë në “BB-” nga “B+”. Ky përmirësim i vlerësimit vjen si një njohje e qëndrueshmërisë ekonomike të Shqipërisë dhe menaxhimit të matur të financave publike në përballje me një sërë sfidash të njëpasnjëshme.
RAPORTI
Agjencia ka vlerësuar se Shqipëria ka treguar në vijimësi aftësinë e saj për t’i bërë ballë goditjeve, përfshirë tërmetin e vitit 2019, pandeminë e COVID- 19 dhe efektet e tërthorta makroekonomike të luftës Rusi
Ukrainë, duke vënë në dukje rritjen e qëndrueshme të ekonomisë në tre vitet e fundit dhe përmirësimin e parametrave të financave publike.
Sipas Agjencisë, qëndrueshmëria ekonomike e vendit i atribuohet pjesërisht rrijes së turizmit, e cila “ndihmoi Shqipërinë të rrisë eksportet e shërbimeve me afro 15% të PBB- së midis viteve 2019 dhe 2023, duke forcuar ndjeshëm pozicionin e saj të jashtëm”. Për më tepër, agjencia evidenton se “autoritetet shqiptare kanë shfaqur angazhimin e tyre për konsolidimin fiskal. Të kombinuara me rritjen e fortë ekonomike, këto përpjekje kanë çuar në një reduktim të konsiderueshëm të borxhit publik, nga një pikë prej 74.5% të PBB- së në vitin 2020 në një vlerësim prej 58% në vitin 2023. Agjencia parashikon se autoritetet do synojnë të ruajnë këtë qasje të matur ndaj financave publike, në përputhje me Ligjin Organik të Buxhetit, duke siguruar që borxhi publik i Shqipërisë të mbetet i qëndrueshëm në një mesatare prej rreth 55% të PBB- së gjatë viteve 2024– 2027”.
“S& P” ka vlerësuar rënien e borxhit publik, nga 74.5% të PBB- së në vitin 2020 në 59.2 % në vitin 2023, sipas autoriteteve shqiptare, duke parashikuar se “autoritetet do të synojnë të ruajnë këtë qasje të matur ndaj financave publike, në përputhje me Ligjin Organik të Buxhetit, duke siguruar që borxhi publik i Shqipërisë të mbetet i qëndrueshëm në një mesatare prej rreth 55% të PBB- së gjatë viteve 2024– 2027”.
“S& P” parashikon se perspektivat e rritjes së moderuar të Shqipërisë dhe rezervat relativisht të larta ofrojnë një mbrojtje ndaj goditjeve të mundshme të jashtme gjithashtu pret që autoritetet të mbeten të matura nga ana fiskale, duke mbajtur borxhin publik në një trajektore të qëndrueshme dhe gradualisht rënëse.
Agjencia vlerëson se Shqipëria do të ndërmarrë hapa institucionalë në mbështetje të ofertës së saj për anëtarësim në BE deri në vitin 2030. Vendi ka zbatuar një sërë reformash për të kapërcyer pengesat në infrastrukturë, duke përafruar më tej kuadrin ligjor, i shtyrë nga ambicia e tij për t’u bashkuar me BE- në. Megjithatë, sfidat e brendshme kërkojnë reforma të vazhdueshme strukturore për t’u harmonizuar me acquis të BE- së, thuhet në raportin e saj.