Gjermania rikthehet e frikshme, Kros: Grup fenomenal
Mesfushori "debutoi" me asist pas 7 sekondash lojë
Përfaqësuesja e Gjermanisë korri fitore të jashtëzakonshme në Lion kundër Francës. Trendi negativ i rezultateve hodhi idenë se Julian Nagelsman do përballej më një natë "makthi" në duelin me grupin e Didië Deshamp, por fusha demonstroi tjetër qasje.
Florian Virc dhe Kai Haverc mbylli në "kotec gjelat" transalpinë, duke ia lënë vendin spektaklit, aq sa trajneri rivalë mbeti i befasuar nga tempi dhe dëshira e gjermanëve për të fituar përballjen. Paraqitja e "pancerave" me lojë të zhdërvjelltë dhe efikase në fazën ofensive kishte vite që ishte harrur në memorien e tifozëve, por Nagelsman ka hedhur baza të forta se organizatorët e "Euro 2024" janë mes pretendentëve për t'u kurorëzuar.
Ndeshja- Vetëm 7 sekonda i mjaftuan Florian Virc për të zhbllokuar ndeshjen përmes goditjes fenomenale, e ardhur nga pasimi mjeshtëror i të rikthyerit në gjirin e kombëtares, Toni Kros. Eksperienca e "veteranit" ndikoi që në minutat e para, aty ku "shkrirja" e lojës "hipnotizoi" vendasit. Në fraksionin e parë të lojës MarkAndre ter Shtegen realizoi pritje heroike ndaj Kilië Mbape, e cila mund të kishte ndryshuar fatet e takimit. Me nisjen e pjesës së dytë, të besuarit e Julian Nagelsman mbajtën të njëjtën "melodi" kombinimesh, e përkthyer me golin e dytë, kësaj radhe me autorë Kai Haverc. "Dirigjenti" Nagelsman nuk i la asnjë shans rivalit të merrte lojën në kontroll, çka surprizoi edhe kritikët më të mëdhenj, marrë në konsideratë moshën e ish- trajnerit të Bajernit, 36 vjeç. Lojtari më i mirë i ndeshjes Toni Kros nuk kishte se si të mungonte në zonën e prononcimeve, i cili mbeti i befasuar nga talentet në kontingjent, sikurse performancën e debutuesit Maksi Midelshtad:
Kros-" Sigurisht që jam i kënaqur me triumfin. Por ajo që më ngroh më tepër ka të bëjë me interpretimin tonë. Asnjëherë s'është e lehtë të luash kundër Francës, e cila ka ndërtuar grup fitues dhe kompakt, ama ne ia dolëm. Kemi hedhur hap të madh drejt Kampionatit Europian. I bindur se edhe tifozët do fillojnë të besojnë te ne. Duke nisur nga rasti i golit të Virc e deri në presingun e lartë, e kemi aplikuar gjatë seancave stërvitore. Kanë qenë vërtetë intesive, por ia kanë vlejtur. Uria e Midelshtad më bëri shumë përshtypje. Edhe pse ai përjetoi sfidën e parë me kombëtaren, dhuroi paraqitje fenomenale, sikurse pjesa tjetër e ekipit. Që nga ndeshja e fundit me fanellën e Gjermanisë e deri te kthimi ndihet ndryshimi, jo vetëm në emra, por edhe frymë. Kontingjenti është i mbushur me talente të klasit botëror. Kënaqësi të luajë me ta. Virc më ka lënë shije mbresëlënëse, të njëjtën mendimi ndaj edhe mbi teknikën e Musialës. Fitorja do na shërbejë në shumë drejtime. Dueli i radhës vjen shpejt dhe suksesi kundër një prej ekipeve më të mira në botë na rrit besimin, megjithatë është vetëm një ndeshje, prandaj duhet t'i ruajmë fortë vlerat që demonstruam në Francë", përfundoi Toni Kros. Statistikat e mesfushorit në pronësi të Real Madridit i vunë kapak natës magjike ndaj "gjelave".