Nagelsman lavdëron ekipin: Ndeshje perfekte, Kros i pabesueshëm
Julian Nagelsman me suksesin e pastër dhe plotë elegancë ndaj Francës 2- 0, ku u evidentuan qarkullimi i shpejtë me një kontakt të topit dhe krijimi i korridoreve në zona të ngushtë, ia mbylli gojën të gjitha kritikave se ai nuk është i gatshëm për të marrë mbi supe një detyre kaq të rëndë, rikthimin e Gjermanisë në nivele të larta. Tekniku 36- vjeçar vlerësoi urinë e grupit dhe paraqitjen e Toni Kros, duke e ngritur deri në nota maksimale:
Komplimente për grupin. Luajtëm ndeshje perfekte. Nuk i lamë thuajse asgjë kundërshtarit. Në harkun e 25 minutave të para gjithçka foli në krahun tonë. Mos të harrojmë se kë rivalë kishim përballë. Nisja e shpejtë me gol na ndihmoi, megjithëse e kemi përgatitur disa herë në stërvitje. Përgëzoi Virc për golin e jashtëzakonshëm, po lënë në plan të dytë edhe precizionin e Kros në pasim. Përvoja e Toni Kros i dha qetësi dhe besim shokëve të ekipit. Ndonëse vitet bëjnë të vetën, ai mbetet i njëjtë. Jo më kot mban rol protagonist në mesfushën e Realit për vite me radhë. Mbrojta veproi me kujdes në mbulimin e kundërshtarit dhe mbylljen e rrezes goditëse. I aftë të kryejnë me efikasitet edhe detyrat në zonën defensive. Thjesht i pabesueshëm. Toni do mbajë të njëjtin pozicion në fushë edhe në të ardhmen. I ka formësuar karakteristikat e tij përpara prapavijës, lidhjes mes mbrojtës dhe sulmit. Fitorja i jep më tepër meritë autorëve të golave, gjithsesi pritja e Ter Shtegen karshi Mbapes na mbajti në avantazh. Një prej momenteve më të vështira në karrierën time konsistoi para pak ditësh, kur mu desh t'i komunikoja MarkAndre ter Shtegen se Mnauel Nojer do të mbajë rolin e titullarit në katërkëndësh përgjatë Kampionatit Europian. Portieri 31- vjeçar e meriton të jetë numri ' 1', por kur ke në ekip dy nga gardianët më të mirë në botë, atëherë vështirësohet shkalla e marrjes së vendimit.
Triumfi me Francën dhe loja bindëse ka dhënë efekt te Federata Gjermane e Futbollit, ku Presidenti Bernd Nojendorf së bashku me pjesën tjetër të drejtuesve të institucionit më të rëndësishëm në Gjermani t'i servirin në "pjatë" pa filluar "Euro 2024" rinovimin. Kontrata aktuale skadon pas mbylljes së Kampionatit Europian, por në të është e hapur edhe mundësia e zgjatjes përtej verës. Krijimi i frymës pozitive dhe ndërthurja mes talenteve dhe eksperiencës ka rezultuar e goditur në planet e Nagelsmanit, aq sa la me "gisht në gojë" edhe trajnerin Didië Deshmap, i cili la të nënkuptuar pas ndeshjes se "pancerat" i "eklipsuan".