Deshamp: Na morën me shpulla, përgjegjësia bie mbi mua
Trajneri i Francës, Didie Deshamp, nuk ka zgjedhur gjuhë diplomatike pas humbjes 02 kundër Gjermanisë në Lion të shtunën në mbrëmje. Ai i ka shkuar direkt e në thelb problemit, duke bërë veten përgjegjës për paraqitjen e dobët dhe humbjen e merituar të ekipit të tij. Dy gola të Virc dhe Haverc i dhanë suksesin Gjermanisë në atë që mund të jetë antipasta e "Euro 2024". "Nuk arritëm të ngriheshim në nivelin e imponuar nga kundërshtari. Jemi ndëshkuar që në fillim të ndeshjes ( Franca pësoi pas vetëm 7 sekondash), por nuk ishte goli i shpejtë problemi i vetëm. Ne nuk ishim ku duhet për nga agresiviteti dhe vendosmëria. Gjermania tregoi më shumë cilësi. A do të kishim qenë në gjendje të bënim më mirë? Unë mund t'i bëj vetes pyetjen. Niveli ndërkombëtar është i pamëshirshëm. Mund të flasim për teknikë, saktësi, por gjermanët na dhanë një leksion, na dhanë një shuplakë nga e cila duhet të mësojmë. Reagimi ynë ishte i mangët. Ne duhet ta pranojmë këtë humbje të merituar. Nuk fajësoj lojtarët, përgjegjësi i parë për këtë paraqitje dhe për këtë humbje jam unë", tha Deshamp. Trajneri i Francës saktësoi nga ana tjetër se skuadra ka vuajtur jo pak dhe në planin atletik në përballjen kundër
Gjermanisë. "Që Gjermania mund të të vërë në vështirësi kjo nuk është surprizë. Por ne kemi pasur pjesën tonë të përgjegjësisë. Është e vërtetë që ka lodhje për arsye të ndryshme, por as ky nuk është justifikim. Ishim në deficit fizik, kolektivisht dhe individualisht. Nuk kam se çfarë të shtoj më shumë. Vetëm shpresoj që kjo shuplakë të na shërbejë si mësim për në ' Euro 2024'", tha Deshamp.