Arrestimi i Goros, Meta: Rama do që të shkarkojë përgjegjësinë
Kreu i PL- së, Ilir Meta, komentoi dje arrestimin e kryebashkiakut në detyrë të Himarës, Jorgo Goro. Meta theksoi se kjo bëhet në kuadër të drejtësisë me regji nga Rama. Ai vuri në dukje se Rama i përdor zyrtarët për interesa të tij okulte financiare, duke shpresuar se me këto arrestime të shkarkojë përgjegjësinë e tij. “Nuk shohim asnjë gjë që të na impresionojë, përveçse një seri të re të drejtësisë me regji që drejtohet nga kreu i Rama- formës, Edi Rama. Këto probleme kanë qenë të ekspozuara nga opozita prej kohesh. Ky arrestim nuk e zbut situatën e paligjshmërisë që dominion në rastin ‘ Beleri’. Është një demonstrim i politikës së bedelëve që ndjek Rama. Pasi i përdor dhe i shtrydh mirë e mirë për llogari okulte financiare, bazuar në paligjshmëri, bazuar në tjetërsim të pronave, kujton se me arrestime të tilla do të shkarkojë një pjesë të përgjegjësisë së tij, ku përgjegjës dihet që është kreu i ‘ rilindjes’, këto janë si ato matrioshkat ruse”, - tha Ilir Meta. Ai u shpreh se, “shteti ligjor është zhbërë, sepse Rama ka kapur gjykatat, prokurorinë, policinë e çdo gjë. Rasti ‘ Beleri’ e demonstron këtë gjë dhe këtë mendim e kam shprehur në mediat greke dhe ato të huaja. Kreu i Partisë së Lirisë, Ilir Meta, solli në vëmendje koston e jetesës, një problem shqetësues për të rinjtë e të rejat në Tiranë sipas tij. “E papërballueshme është bërë edhe rritja e qirave. Ndërtimi është kthyer sot në një mekanizëm gjigand për pastrimin e parave të pista të krimit dhe korrupsionit. Në Tiranë, 51 mijë apartamente të banuara”, - tha ai.