Komisioni për “Sterilizimin”, debate në mbledhjen e parë mes mazhorancës dhe opozitës
Nga Rama, Beqaj deri tek ortakët e dy koncesionarëve, Vokshi rendit listën: Ja zyrtarët që do të thirren për të dëshmuar
Pas marrëveshjes së arritur mes mazhorancës dhe deputetëve të grupimit Berisha- Bardhi, dje u mblodh komisioni hetimor për “Sterilizimin” dhe ‘ Chek Up’- in. Mbledhja e konstituimit nisi me debate mes kryetares Albana Vokshi dhe nënkryetarit socialist, Plarent Ndreca. Shkak i përplasjes mes palëve u bë deklarata e demokrates Vokshi, sipas së cilës, korrupsioni me këto dy koncesione në shëndetësi kap vlerën e 200 milionë eurove. Vokshi kërkoi nga deputetët e PSsë që të mos bëhen mburojë të korrupsionit. “Uroj që të gjithë anëtarët e këtij komisioni të mos bëheni mburojë e këtij korrupsioni e të përdorni kartonët kundër interesit publik, sepse me 200 milionë euro mund të ishin ndërtuar dhjetëra spitale ultramodernë, qindra qendra shëndetësore dhe dyfishuar pagat e mjekëve”, - tha ajo. Për socialistët, deklaratat partiake bien ndesh me frymën e këtij komisioni, pasi paragjykojnë hetimin ende të pa nisur për dy koncesionet. Demokratët kërkuan edhe firmosjen nga ana e deputetëve të një dokumenti, që nuk janë në konflikt interesi me personat që do thirren për të dëshmuar në këtë komision, duke akuzuar nënkryetarin e këtij komisioni, Plarent Ndreca, se është në konflikt interesi, pasi ka qenë avokat i njërit prej të akuzuarve për sterilizimin. Demokratja Ina Zhupa akuzoi zv. kryetarin Plarent Ndreca se ka konflikt interesi në këtë komision. “Pranuat vetë që keni qenë avokat i njërit prej personave të përfshirë në këtë aferë, pra pranuat që jeni në konflikt interesi. Unë kam një kërkesë procedurale, që ndoshta mund ta zgjidhim nëse është apo jo, le t’i drejtohet SPAK- ut dhe ta pyesim nëse ka qenë avokat i personave të interesuar për çështjen e sterilizimit”, - de
klaroi Zhupa. Por, Ndreca e mohoi një gjë të tillë. “Kam të gjithë kapacitetin profesional për ta vlerësuar vetë nëse kam ose jo konflikt interesi. Nëse do të ketë një të tillë, por siç e gjykoj unë nuk ka një tillë, sepse ato që janë objekt hetimi të prokurorisë
dhe sot në dijeninë time kanë shkuar dhe kanë marrë edhe vendimin për mbylljen e hetimeve, nuk janë objekt i veprimtarisë së këtij komisioni”, - tha Ndreca. Kryetarja Albana Vokshi u shpreh se, të gjithë anëtarët duhet të firmosin një dek
laratë për moskonfliktin e interesit me këtë komision. Deputeti i PS, Klevis Xhoxhi, u shpreh se, “kjo mbledhje që duhet të ishte formale u kthye në propagandë partiake”. Pas diskutimeve, Klevis Xhoxhi u zgjodh sekretar i “Komisionit Hetimor të Kuvendit për Shërbimin Publik të Sterilizimit dhe Shërbimit Publik të Check- Up në Shëndetësi”. Më pas, kryetarja e Komisionit të Shëndetësisë, Albana Vokshi, prezantoi planin paraprak të hetimit. Vokshi tha se mes dëshmitarëve që do thirren për të dëshmuar lidhur me hetimin e dy koncesioneve, do jetë edhe kryeministri Edi Rama, ish- ministrat e Shëndetësisë, Ilir Beqaj dhe Ogerta Manastirliu, ish- ministrat e Financave, Shkëlqim Cani dhe Anila Denaj, ministrja e Shëndetësisë, Albana Koçiu, ish- zv. ministri i Shëndetësisë, Klodian Rjepaj etj.. Pyetja e dëshmitarëve sipas planit të veprimit të komisionit do jetë deri më datë 10 qershor.