Pastrim parash, korrupsion e fshehje pasurie, SPAK komunikon akuzat për Ahmetajn
Sipas hetimit, ish- zv. kryeministri në kohën kur ka mbajtur poste të rëndësishme në qeveri, ka përfituar nga bosët e inceneratorëve
Prokuroria e Posaçme i ka komunikuar akuzat për aferën e inceneratorëve ish- zv. kryeministrit, Arben Ahmetaj përmes avokatit të tij.
Ndaj Arben Ahmetajt janë ngritur akuzat për korrupsion, pastrim parash dhe fshehje pasurie. Avokati i ishzv. kryeministrit, Henrik Ligori, nuk pranoi të bënte komente për mediat, por deklaroi se iu ishte komunikuar zyrtarisht akuza. Përfaqësuesit ligjor të Arben Ahmetaj, i cili ka kërkuar azil në Zvicër, i janë bërë me dije të gjitha aktet e fashikullit hetimor në ngarkim të ishzv. kryeministrit. Zyrtarisht janë tre të pandehur për aferën e inceneratorëve, Klodian Zoto, Mirel Mërtiri dhe Arben Ahmetaj.
Ahmetaj, sipas hetimeve të kryera nga SPAK, në kohën kur ka mbajtur poste të rëndësishme në kabinetin qeveritar, ka përfituar nga bosët e inceneratorëve ryshfete të ndryshme nga pasuri të paluajtshme, pagesa të udhëtimeve dhe dhurata të ndryshme. Ndërkohë që të tre këta persona vijojnë të jenë në kërkim nga drejtësia jonë, ata flasin për mediat edhe nga arratia, duke mohuar akuzat e ngritura nga Prokuroria e Posaçme. Vitin e kaluar, me anë të një investigimi të BIRN u dhanë detaje konkrete, që lidheshin me përfitimin dhe mekanizmat që ishin ndjekur në rastin e ishnumrit dy të qeverisë sonë.
PËRFSHIRJA E AHMETAJT
Kredi të shumëfishta të paguara nga “bamirës të paidentifikuar” në dokumente bankare dhe bashkëpunime të vjetra biznesi me një kompani ndërtimi janë përdorur nga biznesmenët e inceneratorëve Klodian Zoto e Mirel Mërtiri për të paguar ryshfet tek ish- zëvendëskryeministri Arben Ahmetaj, bëhet e ditur nga dokumentet e prokurorisë të disponuara nga BIRN. Dokumentet sugjerojnë se ndryshe nga skemat e thjeshta që dyshohet se janë përdorur nga ish- ministri Lefter Koka për marrjen e ryshfetit nga “Albtek Energy”, ITS dhe kompania e inceneratorit të Fierit, në rastin e Ahmetajt, skemat janë shumë më të komplikuara, duke përfshirë shumë individë, kredi bankare dhe pagesa të dyshimta prej dhjetëramijëra eurosh në ‘ FI Bank’, për të cilat nuk ka shënime se kush i ka kryer. SPAK akuzon Ahmetajn për korrupsion pasiv në gjashtë raste dhe në skema pastrimi parash në më shumë se një rast. Të premten, në një seancë të jashtëzakonshme, Kuvendi i Shqipërisë votoi për heqjen e imunitetit të tij, duke lejuar prokurorinë të kryejë arrestim dhe bastisje banese, por Ahmetaj është larguar nga Shqipëria.
REAGIMI I AHMETAJT
“… Ish- bashkëshortja ime ( që s’ka punuar kurrë në një institucion shtetëror) ka shitur metra katrorë, pronë e deklaruar në deklaratën time të pasurisë, në treg të lirë, si korrupsion? Pronën e familjes të deklaruar me burime të verifikuara, si korrupsion? Hetim kujt ia ka shitur pronën?”, - ngriti pyetje Ahmetaj, duke iu përgjigjur akuzave me pretendimin se po përndiqet padrejtësisht. Hetimi i prokurorisë mbi Ahmetajn, i përmbledhur në një raport prej 320 faqesh që iu dorëzua Kuvendit të Shqipërisë dhe që më pas, i rrjedhur në media, tronditi skenën politike të vendit duke ekspozuar fragmente nga dy dekada, të cilat sugjerojnë korrupsion sistemik, ku përfshihen një numër i lartë zyrtarësh dhe biznesmenësh.
DOSJA HETIMORE
Sipas dosjes hetimore, Ahmetaj ka përfituar së paku 491 mijë euro ryshfet dhe një vilë nga biznesmenët e inceneratorëve dhe një vilë tjetër nga biznesmeni kontrovers, Mond Bego. Një nga skemat lidhet me një investim që Arben Ahmetaj besohet se ka kryer në kompaninë Sheron, një kompani ndërtimi në Tiranë. Pronari i kompanisë u ka deklaruar prokurorëve se marrëdhënien e ka pasur realisht me Ahmetajn, por në dokumente rezultonte ishbashkëshortja e tij. Historia nis në vitin 2005, kur sipas deklaratës në
prokurori të pronarit të kompanisë, Flamur Shena, personi investitor është Arben Ahmetaj. Kompania ka marrë leje ndërtimi për një pallat në Selitë nga Bashkia e Tiranës, në atë kohë, nën drejtimin e Edi Ramës. Prokuroria vëren se Ahmetaj dhe ish- bashkëshortja duket se kanë gënjyer në deklaratën e tyre vjetore të pasurisë, duke deklaruar si burim investimi të ardhurat nga dividentët dhe shitja e aksioneve te kompania “Hermes”. Sipas prokurorisë, shitja e “Hermes” i siguroi Ahmetajt 447 mijë euro dhe ish- bashkëshortes 298 mijë euro, por kjo ka ndodhur vetëm në vitin 2008, ndërkohë që investimi në kompaninë “Shenon” daton nga viti 2006 deri në vitin 2009. “Në lidhje me këtë investim, hetimet vazhdojnë për të identifikuar ligjshmërinë e burimit të të ardhurave, duke pasur parasysh se nga shitja e aksioneve, të ardhurat kanë ardhur më datë 11.06.2008, ndërkohë që investimi ka filluar të paktën që në vitin 2006”, - shkruan prokuroria. Projekti i pallatit duket se ka qenë një investim me potencial të lartë fitimprurës, por duket se punimet nuk kanë ecur siç duhet dhe administratorja ka deklaruar para prokurorëve se ashensorët nuk janë vënë për shkak se nuk kishte shumë
njerëz dhe se ajo nuk e dinte se çfarë bëhej që nga viti 2011.
NJOFTIMI I MBYLLJES SË HETIMEVE
Pesë ditë më parë SPAK bëri me dije se ka përfunduar hetimet ndaj ish- zëvendëskryeministrit Arben Ahmetaj, i dyshuar për korrupsion pasiv të funksionarëve të lartë, fshehje të pasurisë dhe pastrim parash. Për shkak se ishfunksionari vijon të jetë në arrati dhe ndaj tij është lënë në fuqi masa “arrest me burg” në mungesë për aferën e inceneratorëve, prokurorët kishin njoftuar avokatët e tij për njoftimin e akuzës. SPAK nuk dha asnjë shpjegim nëse ka apo jo akuzë zyrtare ndaj Ahmetajt më datë 21 mars, që dyshohet se përftoi favore sikurse udhëtimet luksoze si dhe kreu korrupsion. Po atë ditë u bë me dije nga avokati që përfaqëson të dyshuarin Klodian Zoto, se komunikimi i akuzës nuk ishte bërë i mundur gjatë ditës. E njëjta gjë ka ndodhur edhe për Mirel Mërtirin. SPAK kishte thirrur dhe ish- bashkëshorten e Ahmetajt, Albina Mançka, e cila u përfaqësua nga avokati Ermir Beta përballë agjentëve të BKH- së. Mbrojtësi u shpreh se do të njihet me aktet e fashikullit javën që vjen, kohë në të cilën do të sqarojë edhe pozitën e saj, nëse do t’i komunikohet apo jo akuzë.
Kredi të shumëfishta të paguara nga “bamirës të paidentifikuar” në dokumente bankare dhe bashkëpunime të vjetra biznesi me një kompani ndërtimi janë përdorur nga biznesmenët e inceneratorëve Klodian Zoto e Mirel Mërtiri për të paguar ryshfet tek ish- zëvendëskryeministri Arben Ahmetaj, bëhet e ditur nga dokumentet e prokurorisë