U kap me kokainë, zbulohet ‘ Call Center’ i Shkëlqim Ostrenit, mik i drejtorit
Zbërthimi i telefonave të katër të arrestuarve me 1 kilogram drogë në Tiranë Gjendet një tjetër provë kundër të arrestuarve, mashtronin italianët duke u marrë deri në 30 mijë euro, në kërkim bashkëpronari
Grupi prej katër personave të vënë në pranga, mes të cilëve edhe një oficer policie, përveç trafikut të drogës, tashmë do të përballen edhe me një akuzë të re.
Njërit prej personave të arrestuar, grupi hetimor i zbuloi edhe një “call center”. Hetimet dhe verifikimet e këtij biznesi kanë nxjerrë në pah se viktimat kanë qenë konkretisht shtetas italianë, të cilët janë mashtruar me shuma të mëdha. Gjithçka është zbuluar nga hapjet e telefonave të të arrestuarve dhe bëhet me dije se shumat e mashtrimit të shtetasve të huaj shkonin deri në 30 mijë euro. Detajet janë bërë me dije dje, ndërkohë që janë me dhjetëra rastet e mashtrimeve masive të shtetasve të huaj të ndodhura në vendin tonë, ndërkohë që asnjë instancë që heton bizneset e paligjshme nuk i ka vënë re derisa janë bashkuar me dhjetëra padi të shtetasve të vendeve të Bashkimit Europian. Edhe pse disa prej tyre u goditën, këto “call center”a, me fokus shumëllojshmëri mashtrimesh, vijojnë të jenë nëpër të gjithë vendin, por kryesisht në Tiranë.
HETIMI
Burimet zyrtare bënë me dije se kokaina e gjetur në Rrugën e Kavajës mbrëmjen e 21 marsit në Tiranë, ku u kapën 3 persona, njëri prej të cilëve tentoi të përplaste agjentët e antidrogës me makinë, zbuloi një “call center” në rrugën “Idriz Guri” në Astir, në të cilin ushtrohej aktiviteti i paligjshëm i mashtrimit me bursën FOREX. Ambienti është në pronësi të njërit prej personave të arrestuar, Shkëlqim Ostreni dhe një tjetri, M. H., i shpallur në kërkim nga AMP. Gjatë kontrollit në këtë ambient u sekuestruan në cilësinë e provës materiale, dokumente, pajisje të ndryshme dhe njësi kompjuterike, në të cilat ishin të instaluara programe, aplikacione dhe lista emrash me numra italianë, të cilët kontaktoheshin nga operatorët, duke i mashtruar për investime në bursë, nëpërmjet të cilave arrinin të përfitonin vlera monetare të kon
siderueshme, që variojnë nga 500 deri në 30 mijë euro për person. Për të dy pronarët u caktua “arrest në burg” nga Gjykata e Tiranës, në akuzë për mashtrim kompjuterik, ndërsa Ostreni është në akuzë më herët për prodhim dhe shitje të narkotikëve. Identifikimi i këtij “call center”- i u bë pas këqyrjes së detajuar të komunikimeve telefonike mes 3 të arrestuarve dhe personave të tjerë, deklarimeve të disa personave që tregojnë rrethana të hetimit, si dhe këqyrjes së pamjeve filmike.
PROKURORIA
“Gjatë kontrollit të ushtruar në ‘ call center’ janë sekuestruar në cilësinë e provës materiale, dokumente, pajisje të ndryshme dhe disa njësi kompjuterike, në të cilat ishin të instaluara programe/ aplikacione dhe lista emrash me numra italianë, të cilët kontaktoheshin nga disa operatorë, duke i mashtruar për investime në bursë, nëpërmjet të cilave arrinin të përfitonin vlera monetare të konsiderueshme, që variojnë nga 500 deri në 30.000 euro.
Mbi bazën e materialeve hetimore të administruara deri në këtë fazë i është relatuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, caktimi i masës së sigurimit personal me karakter shtrëngues, në mungesë, për shtetasit M. H., 33 vjeç, i dyshuar për veprën penale “Mashtrim kompjuterik” i kryer në bashkëpunim, si dhe regjistrimin e të njëjtës vepër për personin nën hetim Shkëlqim Ostreni, i arrestuar më parë si i dyshuar për veprën penale “Prodhim dhe shitje narkotikësh”, - ka njoftuar AMP.
Më herët nga komunikimet e treshes Eneo Sulejmanaj, Shkëlqim Ostreni dhe Igli Begaj u arrestua oficeri i Operacionales, Ervis Shkurta, i cili dyshohet pjesë e grupit kriminal. “Visi i Pazarit” ka qenë afër vendit të ngjarjes kur Sulejmanaj tentoi të shtyp me makinë agjentët e Antidrogës dhe sapo ka parë që kolegët e tij ndërhynë, ka njoftuar grupin tjetër që prisnin për të marrë kokainën.