Trafik armësh nga Shkodra në Tiranë, në pranga ish- efektivja e Burgjeve

Në një garazh në zonën e “Freskut”, policia ka ndërhyrë duke ndaluar një automjet për kontroll. Pas informacioneve të shkuara në rrugë konfidenciale, efektivët ndërhynë dhe zbuluan se në bagazhin e automjeti gjendej një arsenal armësh. Në mjet duke u bërë gati për nisje ishin 5 të rinj, mes të cilëve edhe një vajzë 22 vjeçe. Sipas të dhënave, të rinjtë ishin nisur nga fshati Repisht i Malësisë së Madhe për në Tiranë dhe synimi ishte shitja e këtij arsenali armësh me 4 automatikë dhe 5 pushkë në grupet kriminale, që bazën e kanë rreth e qark kryeqytetit. Por, agjentët e Seksionit të Trafiqeve të Paligjshme në Policinë e Tiranës gjurmuan aktivitetin kriminal të 5 të rinjve përmes informacioneve të ardhura më herët nga inteligjenca informative dhe i arrestuan në flagrancë në rrugën e Rinasit teksa i ishin drejtuar kryeqytetit me dy makina. Grupi i të rinjve kishte për garanci edhe një ish- efektive të Policisë së Burgjeve, Denisa Halilaj, 22 vjeçe, e cila bashkë me Denis Hasajn, 18 vjeç, prinin me një makinë “Golf” për të vëzhguar çdo lëvizje të dyshimtë të patrullave të policisë, ndjekur nga një “BMW”, në të cilën ishin 3 persona, Marjan Hasaj, 26 vjeç, Redi Nika, 18 vjeç dhe Sabian Hasaj, 22 vjeç. Në makinën e dytë, në bagazh, brenda në një valixhe u gjetën armët, të cilat u sekuestruan bashkë me krehër dhe municion luftarak.

Agjentët e trafiqeve sekuestruan edhe 2 makinat e 5 celularët e të gjithëve, te të cilët shpresohet se do të gjenden prova të rëndësishme për identifikimin e personave të tjerë në këtë veprimtari kriminale.