Raportuesja për Shqipërinë në PE: Po monitorojmë ligjin për “Zonat e Mbrojtura”

Raportuesja për Shqipërinë në PE, Isabel Santos, në konferencën për media foli në lidhje me sfera të ndryshme të jetës në vendin tonë. Santos përgëzoi Shqipërinë për rolin e saj në rajon, ndërsa theksoi se procesi i integrimit në BE po shkon mirë. “Po ndjekim nga afër ligjin për ‘ Zonat e Mbrojtura’, për të parë sesi do të bëhet zbatimi i tij. Vëmendja jonë është e përqendruar edhe tek liria e mediave. Situata duhet të përmirësohet kur bëhet fjalë për mjedisin për gazetarët, si dhe për transparencën e pronësisë dhe financimit të mediave. Shumë gjëra shkojnë mirë në progresin e Shqipërisë për në BE, e cila është e hapur dhe nuk përjashton raportet e Tiranës me cilindo partner, edhe Turqia mund të jetë një aleat i Shqipërisë. Integrimi i pakicave është një temë e rëndësishme. Kjo është një çështje e rëndësishme ku duhet të ndërtojmë një shoqëri solidar edhe të fortë. Doja të theksoj rolin rajonal dhe ndërkombëtar të Shqipërisë që janë në përputhje me vlerat e BE- së për ne në këtë moment është diçka që duhet ta qartësojmë. Duke përgëzuar vendin se si po e ruan vendin në sferën globale”, - tha ajo. Qëndrimin e Greqisë ndaj Shqipërisë për çështjen Fredi Beleri, Santos e quajti të tmerrshëm. “Jam e keqardhur për këtë lloj deklarate nga Greqia. Aq sa di, autoritetet gjyqësore po bëjnë punën e tyre, është një çështje që lidhet me zgjedhjet dhe diçka e keqe që është bërë. Duke qenë se nuk është mbyllur nga organet gjyqësore, duhet të presim vendimin e gjykatës. Nëse të gjitha vendet do të sanksiononin apo do të bënin deklarata të tilla kur një shtetas i tyre përballet me një proces gjyqësor, bota do të ishte e tmerrshme”, - tha Santos. Nga politika, pasi u takua me përfaqësues të saj si nga shumica socialiste dhe dy partive demokratike kërkoi bërjen e reformës zgjedhore shpejt dhe në kohë. “Në vendin tim thuhet që duhen dy veta për tango, për dialogun duhen dy veta. Faji nuk është te njëra palë. Kur ka mosmarrëveshje apo diçka që nuk ecën, faji është i dy palëve. Jemi ende në kohë, mesazhi është që partia në pushtet dhe opozita të gjejnë një konsensus minimal për të ecur përpara në kohë për zgjedhjet e 2025”, - u shpreh Santos. Zyrtarja e Bashkimit Evropian i tha qeverisë se është nën vëzhgimin e Brukselit për zbatimin e ndryshimeve të bëra në ligjin për “Zonat e Mbrojtura”. Ai u kritikua nga BE me argumentin se nuk pati konsultim publik të mirëfilltë, gjithëpërfshirës dhe transparent.