Begaj dekreton “Amnistinë Penale”, 700 të burgosur lirohen menjëherë

Votimi thelloi çarjen mes dy pjesëve të PD- së, asaj që drejtohet nga Lulzim Basha dhe asaj që drejtohet nga Sali Berisha

Presidenti Bajram Begaj firmosi dje dekretimin e “Amnistisë Penale”, pasi Kuvendi i dha dritën jeshile javën e kaluar.

“Amnistia Penale” u miratua në Parlament me 110 vota pro. Nga ky ligj përfitojnë 1100 të dënuar dhe të paraburgosur, ku krahas 700 të dënuarve, 400 të tjerët do të përfitojnë ulje dënimi nga 1.5 deri në 2 vite burgim. Të përjashtuar kategorikisht janë të dënuarit nga Gjykata e Posaçme për Korrupsion, apo për përfshirje në organizata kriminale. Një numër i madh i përfituesve nga amnistia janë protestues të opozitës, një kusht tjetër ky i vendosur nga demokratët për ta votuar këtë projektligj. Projektligji u miratua pas disa muajsh vonesë për shkak të debateve mes palëve politike. Me 110 vota pro, 1 abstenim nga Ermonela Felaj dhe 1 kundër nga Agron Shehaj, miratimi i “Amnistisë Penale” do u japë lirinë 700 të dënuarve, ndërsa 400 të tjerë do përfitojnë ulje dënimi. Gjatë votimit ra në sy se Oerd Bylykbashi votoi pro “Amnistisë” në parim, pro amendamenteve të Bardhit, por zgjodhi të mos e votojë në tërësi “Amnistinë”. Në amendamentet e dorëzuara në Kuvend parashikohet falja e të gjithë protestuesve të opozitës, përjashtuar ata që kanë goditur punonjësit e policisë. Por edhe ata që nuk fitojnë lirinë, do të përfitojnë ulje dënimi më të madhe sesa në variantin e parë. Opozita propozoi që nga vitet e dënimit, prej kësaj amnistie t’u zbriten dy vite nga dënimi i mbetur për gratë dhe 1 vit e gjysmë për burrat. Prej amnistisë pritet të përfitojnë rreth 700 të burgosur dhe rreth 2500 persona në shërbim prove. Miratimi i “Amnistisë Penale” erdhi pas dakordësisë së arritur mes PS- së dhe grupit të “Rithemelimit”.

REAGIMI

Votimi i “Amnistisë Penale” duket se ka thelluar çarjen mes dy pjesëve të Partisë Demokratike, asaj që drejtohet nga Lulzim Basha dhe asaj që drejtohet nga Sali Berisha. Nënkryetarja e PD- së, Flutura Açka, shpjegoi se procesi i “Amnistisë” jo vetëm ishte jotransparent, por në thelb ligji duke falur personat e dënuar nga Gjykata e Posaçme ishte një puc ndaj Parlamentit. Për këtë arsye, kryesia e PD- së së drejtuar nga Lulzim Basha miratoi një rezolutë për të përsëritur mbështetjen ndaj SPAK- ut. “Ishte mirëfilli një minim i asaj për të cilën ne kemi kaq kohë që flasim dhe kaq kohë që luftojmë. Të amnistosh akoma pa dhënë rezultatet e para SPAK- u, të sjellësh amendamente që ndikojnë në punën e SPAK- ut, kjo jo vetëm për ne si deputetë në tërësi, por sidomos për opozitën është minus i madh para shqiptarëve, unë kështu e kam parë”, - tha Açka. Rezoluta e miratuar nga demokratët e drejtuar nga Lulzim Basha përveç mbështetje për SPAK- un, përfshiu edhe Reformën Zgjedhore dhe rëndësinë që kanë për PD- në listat e hapura, sistemi proporcional kombëtar e vota e diasporës. Por, nënkryetarja Açka përsëriti se PD nuk bëhet pjesë e grupit të punës që ka për detyrë realizimin e kësaj reforme. “Mua më duket se me këtë platformë është sikur ta kalosh Parlamentin në një birë, në një skutë ku nuk është e hijshme për asnjërin prej nesh. Dhe pikërisht kjo tryezë me 6 vota të vendosë për fatet e Reformës Zgjedhore, për fatet e zgjedhjeve të ardhshme, mua më duket se diçka është shembur në trupin e këtij që quhet Parlamenti i Shqipërisë”, - tha Açka. Në këtë situatë, për zonjën Açka, një koalicion me demokratët e drejtuar nga Sali Berisha është pothuaj i pamundur. “Ne i kemi bërë shumë të qarta vijat tona të kuqe dhe janë bërë të qarta më 9 shtator 2021, nuk mund të ndryshojmë dhe i jemi mbajtur parimisht kësaj gjëje. Çështja është çfarë do të bëjë pala tjetër, e cila ka dy vite që vetëm sulmon këtë pjesë të PD- së, që u ka bërë të qartë shqiptarëve që kompromise me çështjen e ‘ non gratës’ ne nuk mund të bëjmë dot”, - shtoi Açka. Nënkryetarja Flutura Açka shpjegoi se strategjia e elektorale e PD do të fokusohet te të gjithë ata qytetarë, që nuk votojnë që deri më tani dhe kanë refuzuar klasën politike duke u premtuar një qasje ndryshe me deputetët me integritet, me politikanë që japin llogari para zgjedhësve.