Denoncimi, Këlliçi: Si e “gostiti” Redi Molla Klodian Zoton me 1 milion euro tender
Anëtari i Kryesisë së PDsë, Belind Këlliçi denoncoi dje një tjetër aferë korruptive që lidhet me ish- drejtorët e Bashkisë së Tiranës. Këlliçi publikoi fakte se si ish- drejtori, Redi Molla i arrestuar tanimë nga SPAK ka “gostitur” me tender 1 milion euro, Klodian Zoton, ky i fundit i përfshirë në aferën e inceneratorit. “Në vitin 2019, Redi Molla në cilësinë e Titullarit të Autoritetit Kontraktor të UKT, i jep tenderin me referencë REF- 24634- 05- 30- 2019, për matësat e ujit për subjektet private, kompanisë famoze ITS sh. p. k., në pronësi të prestanomes Klodian Zoto. Vlera e këtij tenderi është plot 1 milionë euro. Pra fare thjeshtë, Redi Molla gostiti prestanomen e pronarit faktit të Inceneratorit të Tiranës, shefin e tij politik dhe administrativ, Erion Veliajn. Sigurisht dhe kjo një proçedurë me shumë problematika dhe afate të tejzgjatura. Për shumë nga ju nuk do të përbënte habi që kjo të ishte thjeshtë vjedhja e rradhës nga taksat tona. Por përzgjedhja e kësaj kompanie, ka një arsye dhe motiv shumë më të fortë. Sipas dokumentave të dorëzuara nga ana jonë dhe hetimeve të deritanishme të SPAK, faktohet se: Kompania ITS sh. p. k. ka zhdukur nga llogaritë e inceneratorit të Tiranës shumën 12 milionë euro pa asnjë faturë dhe shërbim të kryer. E thënë më thjeshtë, ITS sh. p. k. është valixhja me të cilën pronari faktik i Inceneratorit Tiranë, ka vjedhur dhe transferuar në llogari OFF SHORE më së paku 12 milionë euro. E gjitha kjo nuk do të kishte ndodhur, nëse Erion Veliaj nuk do të kishte bllokuar punën e Njësisë së Zbatimit të Projektit, që kishte një detyrë të vetme, të monitoronte lëvizjet e parave dhe investimin në landfillin e Sharrës. Zv. Kryeministrja Belinda Balluku ja ka shkruajtur e zezë mbi të bardhë, në korrik të vitit 2023 drejtpërdrejtë Erion Veliajt, që ai dhe vetëm ai është shkaktari i bllokimit të NJZP- së dhe se do të mbante ai përgjegjësi për çdo dëm që po i shkaktohej palës shtet”, - tha Këlliçi. I bëj thirrje SPAK, shtoi ai të zgjerojë hetimet, ku të përfshihet dhe ky tender, detaje për të cilin do i’a përcjellim zyrtarisht z. Dumani. Sipas tij: “Cdo tender i firmosur nga Erion Veliaj dhe struktura e tij kriminale në bashki, është thjeshtë dhe vetëm një pazar korruptiv, ku përfitimi i kësaj organizate kriminale shkon deri më 100%”.