“Shenja paqeje në LM”, NYT: Izraeli anulon hakmarrjen ndaj Iranit pas ndërhyrjes së Biden

Ajo që u duk si fillimi i një lufte me përmasa katastrofike mund të mbetet me aq. Izraeli ka anuluar çdo hap hakmarrës ndaj Iranit pasi ky i fundit nisi qindra dronë e raketa drejt territorit hebre. Lajmi konfirmohet nga prestigjiozja amerikane “The New York Times”, e cila shprehet se Benjamin Netanyahu ka anuluar planin për t’iu kundërpërgjigjur Teheranit. Gazeta shkruan se edhe pse Kabineti i Luftës në Tel Aviv vendosi për një hakmarrje, plani është anuluar pas ndërhyrjes personale të Joe Biden. Shtëpia e Bardhë është shprehur sipas NYT se Izraeli tregoi se mund të mbrohet nga një sulm iranian dhe kjo është e mjaftueshme. Presidenti amerikan mendohet se e ka bindur kryeministrin izraelit edhe me faktin se bombardimi iranian nuk shkaktoi dëme serioze. Gjithashtu Uashingtoni ka apeluar për shmangien e çdo konflikti të ri në Lindjen e Mesme. Garda Revolucionare Islamike e Iranit nisi dje goditjen ushtarake me raketa balistike dhe dronë ndaj territorit izraelit. Sipas njoftimeve, zëdhënësi i Trupave Mbrojtëse të Izraelit Daniel Hagari u shpreh të dielën se nga 13 prilli në mbrëmje deri më 14 prill, Irani lëshoi rreth 300 raketa e dronë kundër Izraelit dhe 99% prej tyre u bllokuan nga sistemi i mbrojtjes ajrore. Sipas njoftimeve të medias izraelite, gjatë bisedës telefonike të bërë të dielën me kryeministrin izraelit Benjamin Netanyahu, presidenti amerikan Joe Biden u shpreh se SHBA- ja kundërshton kundërpërgjigjen e Izraelit ndaj Iranit dhe nuk do të marrë pjesë në ndonjë sulm të mundshëm. Sekretari i Përgjithshëm i OKB- së Antonio Guterres lëshoi një deklaratë përmes zëdhënësit, ku dënon sulmin masiv të Iranit ndaj Izraelit dhe fton të dy vendet që të ndalojnë menjëherë veprimet armiqësore shkruan CMG.