Stërvitje fizike, ja si të kuqtë përgatisin ndeshjen
Xhanoti do disiplinë, Starova e Tomori vëzhgojnë
Partizani ka zhvilluar dje stërvitjen e fundit në vendin tonë, pasi sot, në orën 10:00, do të niset drejt Budapestit ku edhe do të luhet ndeshja e kthimit ndaj Ferencvaroshit. Të kuqtë kanë mbërritur rreth orës 18: 20 në kompleksin stërvitor në Pezë Helmës, ku i janë dashur rreh 20 minuta që të startojnë procesin stërvitor. Në momentin që lojtarët po dilnin në fushë, në skuadër ka mbërritur edhe blerja më e re, Luka Bertoni i shoqëruar me një nga punonjësit e klubit. Ai është ndërruar menjëherë dhe është bashkuar me pjesën tjetër të skuadrës, duke biseduar fillimisht me stafin teknik. Atmosfera - Në prag të një ndeshjeje mjaft të rëndësishme, atmosfera në skuadër ka qenë mjaft e mirë dhe mes lojtarëve nuk ka munguar në asnjë moment harmonia. I vetmi që nuk është parë në humor ka qenë përgatitësi atletik Kristiano Xhanoti, i cili kërkon që baza materiale t'i vihet sa më shpejt në dispozicion dhe kur një gjë e tillë ndodh, nis nga puna. Stafi teknik kishte zgjedhur një stërvitje kryesisht fizike në minutat e para të saj dhe Xhanoti së bashku me Sormanin kanë kërkuar nga të gjithë lojtarët disiplinë. Trajneri italian jo pak herë ka thirrur në drejtim të futbollistëve të tij që të jenë të fokusuar tek ajo që po bëjnë dhe u duk se ka mbetur i kënaqur nga ajo që ka parë në fushë. Pas këtij momenti, trajneri ka punuar në aspektin tekniko- taktik duke menduar për formacionin që do të hedhë në fushë nga minuta e parë, i cili nuk pritet të ketë ndryshime në krahasim me takimin e parë që u luajt në "Elbasan Arena". Lojtarët - Për ndeshjen ndaj Ferencvaroshit, trajneri Sormani do ta ketë të plotë skuadrën, pasi edhe Torasa ka zhvilluar normalisht stërvitje me pjesën tjetër të ekipit. Ndërsa Vila e ka ndjekur takimin si spektator, por nuk rrezikon aktivizimin, duke qenë se bëhet fjalë vetëm për një lodhje muskulore. Drejtuesit - Ndërkohë që skuadra zhvillonte normalisht procesin stërvitor, Drejtori i Përgjithshëm Genc Tomori dhe këshilltari i presidentit Demi ndiqnin jashtë rrethimit të fushës gjithçka ndodhte. Jo pak herë janë parë që të diskutojnë mes tyre në lidhje me atë që ndodhte gjatë përgatitjeve.