Fejzullahu drejt largimit, gati të paguajë 50 mijë €
Edhe pse pak ditë më parë u fol për një afrim të mundshëm mes Partizanit dhe mbrojtësit Arbnor Fejzullahu, duket se ky i fundit do të largohet përfundimisht. Burime pranë të kuqve kanë bërë me dije se lojtari është gati të paguajë klauzolën prej 50 mijë eurosh që Partizani kërkon dhe të dalë lojtar i lirë për t'u bashkuar me secilën skuadër që ai dëshiron. Më parë mbrojtësi ka humbur gjyqin me klubin, pasi pretendonte se kishte parregullsi në kontratë dhe ai duhet të dilte i lirë, por Dhoma e Zgjidhjes së Konflikteve i dha të drejtë Partizanit. Në këtë mënyrë, drejtuesit federuan lojtarin për ndeshjet e Europës edhe pse ai nuk u bashkua asnjëherë me ekipin. Largimi i Fejzullahut sjell edhe humbje financiare për klubin e kuq, duke qenë se në drejtim të mbrojtësit ka pasur një ofertë nga kampionati turk, nga e cila kryeqytetasit do të përfitonin jo pak, por 150 mijë euro. Sa i takon të ardhmes së lojtarit, sipas të gjitha gjasave ajo do të jetë te kampionët e Skënderbeut që kanë shfaqur interes për të marrë shërbimet e tij.